A oitava edición do FanCine de Lemos chegou a súa fin tras cinco días de cine fantástico e videoxogos en diferentes espazos da Ribeira Sacra.
O festival foi posible grazas ao apoio económico da Deputación e a Rede Museística Provincial de Lugo, así como do Concello de Monforte, Concello de Sober e Concello da Pobra do Brollón, ademais do Ateneo Casino de Monforte e Curtidos Coiro.
Calidade no contido e na forma
“A edición deste ano afianzou o FanCine como un referente no panorama de festivais galegos,” afirma o director do festival, Iván Patiño. “A alta calidade dos contidos foi fundamental, tanto da oferta audiovisual como a nivel de formación a través das clases maxistrais e coloquios.”
Patiño tamén identifica como clave a posta en valor de “espazos sostibles que conxugan tradición e identidade” como son as adegas medievais de Vilachá, que se estrearon este ano como un dos emprazamentos do FanCine.
Outro emprazamento fóra de Monforte, a adega Algueira en Sober, acolleu a gala de clausura do festival. A actriz Beatriz Serén foi a encargada de enfiar a entrega de premios, que foron para El Semblante (Mellor Curtametraxe), Canibalismo (Mellor Curtametraxe Galega) e Covid Love (Mellor Curtametraxe Internacional). A curta Loop recibiu unha Mención Especial e o Premio do Público gañouno Oro de Manuel Valcárcel.
Público fiel e novas audiencias
Tanto a gala de clausura como o resto das xornadas de FanCine tiveron unha boa asistencia de público. “Vemos que estamos a atraer a un público fiel e cada vez máis esixente,” comenta Iván Patiño. Incide ademais na conexión con público novo a través de iniciativas como o FantaFesti e a formación ofertada ao longo do festival, que este ano centrouse no puxante sector do videoxogo.
“Seguimos plantando unha semente entre os máis novos e novas, amosando que o audiovisual pode ser unha vía para o seu futuro laboral” engade Patiño.
Un impacto cada vez maior
O impacto económico do FanCine de Lemos no territorio é outro dos aspectos que salienta o director do festival. “Non podemos esquecer que a cultura tamén dinamiza a economía. O FanCine repercute na hostalería e industria turística local, así como na industria cultural en xeral, e crea traballo polo amplo apoio loxístico e de infraestruturas que precisamos ao longo ao festival”.
Visión de futuro
Un festival que conta con seguir a medrar. O equipo directivo aproveitou o coloquio de fin de festival de onte domingo na Casa da Cultura de Monforte para adiantar a teima do FanCine de Lemos 2023, que homenaxeará a icónica película El Exorcista no 50 aniversario dende a súa estrea.•
