A iniciativa da Xunta vai dirixida a participantes que teñan licenza federada ou formen parte do Programa Xogade
O fomento da vida saudable durante a infancia e a adolescencia pasa por favorecer a práctica deportiva. Con esta finalidade, a Xunta ten en marcha o Bono Deporte, unha iniciativa que busca apoiar ás familias á hora de adquirir material deportivo para que os seus fillos e fillas poidan desenvolver en mellores condicións os deportes que elixan.
QUEN PODE BENEFICIARSE DO BONO DEPORTE
Os destinatarios do Bono Deporte son todas as familias que teñan fillos e fillas con idades comprendidas entre os 6 e os 16 anos. Os menores deberán ter licenza federada na práctica dalgún deporte, ou ben participar nalgunha actividade do Programa Xogade.
COMO ACCEDER AO BONO DEPORTE
As familias interesadas teñen de prazo ata o 29 de febreiro para descargar o Bono Deporte, desde o móbil ou o ordenador, na páxina web www.bonodeporte.gal. Despois de darse de alta, recibirase un SMS de validación para activar o bono e descargalo nunha aplicación wallet en formato dixital mediante un código QR.
ATA CANDO TEN VALIDEZ O BONO DEPORTE
Unha vez completada a descarga do bono, a contía xa queda reservada e poderá consumirse ata o 1 de xullo de 2024 nos máis de 700 establecementos que se adheriron a esta iniciativa.
QUE SE PODE PAGAR CO BONO DEPORTE
O Bono Deporte desconta un 80% do custo de cada compra ata esgotar o importe. A contía do bono vaise reducindo en función do valor da compra realizada (incluíndo o IVE). A cobertura do Bono Deporte financia a adquisición de material e equipamento deportivo, e tamén conceptos relacionados coa realización de actividades deportivas, como son a cota de clubs, as clases, e o pago de monitores ou de cursos.
COMO SE EMPREGA O BONO DEPORTE
Para pagar co bono, hai que amosar o código QR nos establecementos comerciais e entidades deportivas ou prestadoras de servizos que estean adheridas ao Bono Deporte. O máis de 700 establecementos que se sumaron a esta iniciativa están debidamente identificados cun distintivo da campaña.
A entidade ou establecemento accede á aplicación que, sobre o importe total da operación, encárgase de validar e calcular o prezo final co desconto. Así, a plataforma rexistra a compra, aplica o desconto do bono e actualiza o wallet do cliente.
ENDEREZO ELECTRÓNICO PARA DÚBIDAS E SUXESTIÓNS
Todos os usuarios do Bono Deporte teñen á súa disposición un enderezo electrónico (bonodeporte@xunta.gal), no que poden trasladar as súas dúbidas e suxestións sobre esta iniciativa.
FOMENTO DO DEPORTE BASE
A campaña Bono Deporte súmase a outras iniciativas da Xunta, como o Programa Xogade, para fomentar o deporte base e os valores do deporte entre a rapazada. •
