As probas disputaranse do 1 ó 5 de maio, e terán cobertura mediática internacional

Pantón comeza o mes de maio como capital do golf profesional, xa que as instalacións do complexo Oca Augas Santas Balneario & Golf Resort acollen dende o día 1 ata o 3 de maio as probas do circuíto Ocho Golf Ladies Open Galicia 2013. Según os responsables do complexo lúdico-deportivo, este torneo suporá “a semana de golf máis importante en Galicia durante este ano”, e estiman que esta celebración “axudará a Galicia a posicionarse e codearse cos mellores destinos de turismo de golf do mundo”.

FOMENTO DO GOLF FEMININO A NIVEL EUROPEO

O torneo Ocho Golf Ladies Open Galicia 2013 está patrocinao pola marca de roupa deportiva Ocho Golf, Reale Seguros, Real Federación Española de Golf e Federación Galega de Golf, e promovido por Jorge López Blanco, da empresa The Brand Show Company. O obxectivo deste evento é apoiar o golf feminino profesional, e conta con premios por valor total de 35.000 euros. Asimesmo, diferentes institucións ofreceron o seu apoio a esta iniciativa, como o Concello de Pantón, o Consorcio de Turismo Ribeira Sacra, Deputación de Lugo, Secretaría Xeral para o Deporte e Secretaría Xeral para o Turismo da Xunta de Galicia. Neste sentido, está habilitado un dispositivo formado por 70 voluntarios que dende o 29 de abril ata o 5 de maio contribuirán á boa marcha do torneo.

MÁIS DUN CENTO DE PARTICIPANTES PROCEDENTES DE VINTECATRO PAÍSES

O torneo Ocho Golf Ladies Open Galicia 2013 contará coa participación de 108 xogadoras profesionais procedentes de vintecatro países, que disputarán o seu acceso ó Circuíto Europeo Feminino. A celebración deste importante torneo en Pantón complementouse coa disputa previa, na fin de semana do 27 ó 28 de abril, do Torneo Previo Ocho Golf, que premiou ós tres primeiros clasificados por categoría e ó gañador scratch con trofeos, material deportivo e a clasificación para o ProAm que se disputará os días 4 e 5 de maio. Esta última competición conta coa presencia de golfistas invitadas de México e Perú, e onde as xogadoras amateurs poderán formar equipo coas profesionais.

A CADENA MEXICANA TELEVISA E A ESTADOUNIDENSE GOLF CHANNEL CUBRIRÁN O EVENTO DE AUGAS SANTAS

Según informaron dende a organización do torneo, o Ocho Golf Ladies Open Galicia 2013 contará cunha excepcional cobertura mediática, xa que as probas serán retransmitidas por diversos canais de televisión internacionais como a mexicana Televisa ou a estadounidense Golf Channel.