O alumnado de 1º de Bacharelato do IES A Pinguela participou nunha actividade de intercambio co alumnado do IIS Pascal di Romentino, da cidade italiana de Novara. A comitiva italiana arribou en Monforte o pasado día 5, onde foi recibida polos compañeiros monfortinos e das familias de acollida. Ó día seguinte, os alumnos e alumnas italianos integráronse na dinámica do IES A Pinguela, e realizaron unha visita guiada por Monforte, cun guía da Oficina de Turismo, e pola tarde os seus compañeiros españois servíronlles de guías improvisados pola cidade do Cabe. O venres 7 viaxaron á capital provincial, onde coñeceron o seu pasado romano, e a fin de semana adicárona á convivencia coas súas familias de acollida. Na semana siguiente realizaron diversas excursións a Ourense, para coñecer a súa cultura patrimonial e termal, e a Santiago de Compostela, onde visitaron diversos puntos de interés cultural da capital xacobea. O mércores 12, e antes do regreso a Italia, foi un día de traballo no instituto A Pinguela, e como fin de festa, o alumnado italiano participou nunha comida campestre en Cadeiras, con ruta de sendeirismo incluída. Un grupo de 23 alumnos e alumnas do IES A Pinguela devolveranlles a visita entre os días 9 e 16 de abril. •
