•A mediados deste mes darán comezo as diversas actividades socioculturais e de envellecemento activo, organizadas pola concellería de Benestar Social do Concello de Monforte, contando co financiamento da Vicepresidencia Primeira da Deputación de Lugo. O programa, que se iniciará o 15 de setembro, inclúe actividades moi diversas, dende o exercicio físico á saúde psicosocial, pasando polo ocio e as novas tecnoloxías.
Este amplo abano de actividades van dirixidas ás persoas maiores de 60 anos, co obxectivo de favorecer un envellecemento activo.
CALENDARIO DAS ACTIVIDADES
O luns 15 de setembro comezarán as actividades de xerontoximnasia, cerámica, teatro e pintura, que se desenvolverán ata o 15 de decembro. Na mesma data iniciarase a actividade de informática, que se prolongará ata o 11 de decembro.
O 16 de setembro iniciaranse as sesións de ximnasia acuática, fotografía, memoria e bailes de salón, e rematarán o 11 de decembro. Pola súa banda, a actividade de risoterapia comezará o 17 de setembro
Por último, dende o 19 de setembro ata o 12 de decembro desenvolveranse as actividades de inglés, e relaxación e benestar.
ACTIVIDADES DOUS DÍAS Á SEMANA, OU NUNHA ÚNICA XORNADA SEMANAL
Todas as actividades contarán con dúas sesións á semana, agás cerámica, risoterapia, bailes de salón, relaxación e benestar, e inglés, cunha única sesión semanal.
O salón de actos da Casa da Cultura acollerá as actividades de teatro, risoterapia, e bailes de salón, e a aula da UNED, situada no mesmo edificio, será a sede da actividade de memoria. Na piscina municipal celebrarase a actividade de ximnasia acuática, e no Edificio Multiusos a de cerámica.
O Centro Dogma, na rúa Hortas, acollerá a xerontoximnasia e a actividade de relaxación e benestar. ProwerPC, na rúa Otero Pedraio, será o lugar do curso de informática. Nas Galerías San Antón local 5 terá lugar a actividade de inglés, e as de fotografía e pintura na rúa Doctor Casares 94 baixo.•
