• A Asociación Cultural O Colado do Vento de Sober inicia a súa programación de outono cunha andaina o domingo 1 de novembro. A ruta proposta conta con 8 quilómetros de trazado circular entre os castros da Cividade en Bolmente e o Castriño en Barantes. Na xornada participará un grupo de sendeiristas da zona de Vigo. A ruta partirá ás 10,30 horas do Pinal en Bolmente, e terá unha duración aproximada de 3 horas.
A seguinte actividade do Colado do Vento desenvolverase o sábado 7 de novembro, cun roteiro por Monforte en torno ao «Cancioneiro de Monforte de Lemos», escrito polo poeta Manuel María, autor homenaxeado o Día das Letras Galegas 2016. A saída será ás 10,45 horas diante dos Escolapios, e rematará ás 19 horas na escultura de Manuel María. Esta ruta, guiada por Xosé Rodríguez, está organizada conxuntamente co colectivo Lemos Le. A xornada inclúe lectura de poesía, acompañamentos musicais e unha ofrenda floral. Haberá xantar opcional organizado en Monforte, e os interesados deben inscribirse antes do 4 de novembro no enderezo electrónico coladodovento@gmail.com, ou no teléfono 674 473695.
A natureza misturada coa lenda voltará ser a protagonista na xornada do domingo 15 de novembro, cando se desenvolverá un roteiro de sendeirismo en torno á historia do Coxo de Bulso. Será unha andaina sinxela, de aproximadamente 10 quilómetros, cunha duración de tres horas, facendo parte da ruta «O Coxo do Bulso», deseñada pola asociación O Colado do Vento. A saída será ás 10,30 horas da praza do cruceiro de Pinol xunto á igrexa. Sumarase á andaina un grupo de sendeiristas da zona de Vigo.
Non é preciso anotarse nestas actividades, agás no xantar opcional do día 7.•
