Un novo exemplo de desacordos e falta de entendemento entre políticos que, lamentablemente, tócalle sufrir aos veciños, neste caso, a polémica xorde en Sarria, e ten que ver co IBI, e unha revisión catastral anulada por sentenza xudicial. A primeiros de mes de abril o Presidente Presidente da Deputación de Lugo, José Tomé Roca, deu instrucións aos servizos provinciais de Recadación, Tesourería e Intervención para que procedesen de inmediato á devolución de oficio dos cobros do IBI do Concello aos veciños de Sarria e a non recadar os que aínda estiveran sen liquidar. Unha decisión que se veu obrigado a adoptar á vista da sentenza do Tribunal Superior de Xustiza de Galicia (TSXG) de data do 20 de setembro de 2021 que anula a revisión catastral que se realizou no municipio de Sarria. Un ditame xudicial que afecta a un inmoble e aos que se encontraban na mesma situación. José Tomé declarou que o Concello de Sarria ten cedida a xestión do cobro dos seus impostos nos servizos económicos da Deputación, séndolle ingresado na conta da entidade local o diñeiro recadado, dado que os impostos son os que libremente decide aprobar a Corporación sarriana. Según o Presidente da Deputación, aínda que o Concello non solicitou o reintegro das liquidacións, o Presidente tomou a iniciativa “por ser de xustiza que aos veciños e veciñas se lles devolva o que pagaron no seu día polo Imposto de Bens Inmobles da revisión catastral anulada polo TSXG”.
A institución tramitará a devolución de en torno a 6.000 liquidacións por un importe de arredor de 1.200.000€.
INDECENTE E PARTIDISTA
O alcalde de Sarria e candidato de Camiña Sarria a revalidar a Alcaldía nas eleccións do 28 de maio, Claudio Garrido, cualificou como “politicamente indecente” o “uso partidista da Deputación de Lugo que está a facer o seu presidente, José Tomé, co anuncio da devolución “tan pronto como sexa posible” dos cobros do Imposto de Bens Inmobles (IBI).
Claudio Garrido considera “incrible e inaudito” que o presidente do organismo provincial aproveite a xornada da convocatoria das eleccións municipais para “tratar de enganar á veciñanza de Sarria cunha burda manobra partidista, froito da desesperación ante a debacle que lles espera o 28M, co obxectivo de tentar impulsar o novo candidato socialista, Benjamín Escontrela, que non queren nin os militantes do partido polo que se presenta”.
“Foi o propio José Tomé, que agora pretende vender como un grande logro as devolucións, quen aprobou esas liquidacións cunha resolución de Presidencia o 31 de maio de 2022”, apuntou o alcalde, antes de resaltar que “o Concello de Sarria nin chegou a ingresar eses cartos nin tiña competencias para devolvelos, ao ter delegada a xestión do imposto na Deputación”. Ao respecto, salienta que a través dun escrito dirixido desde a Alcaldía á Xerencia Territorial do Catastro o 19 de setembro de 2022 foi como se solicitou a revisión de todas as notificación de liquidacións realizadas ao abeiro do procedemento simplificado de valoración colectiva por estar caducadas. Un mes despois, concretamente o 21 de outubro de 2022, a Xerencia Territorial do Catastro respondera confirmando a “declaración da caducidade do procedemento simplificado de valoración colectiva”.Garrido repróchalle ao presidente da institución provincial que, a pesar de ter asinado un decreto o 15 de decembro de 2022 no que constataba a anulación das liquidacións do IBI de natureza urbana, eses importes cobrados pola Deputación sigan sen devolver aos contribuíntes tres meses despois”.
“Hai tres meses tiña os mesmos argumentos xurídicos e técnicos que hoxe para proceder á devolución, pero todo apunta a que Tomé estivo retrasando a devolución para facela coincidir coa campaña electoral, o que, ademais de ser mesquiño por xogar cos cartos dos contribuíntes, amosa unha preocupante pretensión de interferir desde a Deputación na campaña electoral de Sarria”, asegurou o alcalde e candidato de Camiña Sarria Claudio Garrido.•
