Galicia é un dos maiores productores de castañas. Con concellos como Vilardevós, Manzaneda, e Courel, esta terra produce castañas de excelente calidade que teñen un impacto económico vital para as familias e unha gran importancia cultural. A metade da súa produción destinase ao consumo fresco, mentres que a outra metade é utilizada polas industrias para a súa transformación en productos como fariñas, cremas e confituras. Este sector proporciona máis de 500 empregos directos e 800 indirectos. Tamén desempeña un papel crucial na prevención de incendios forestais e axuda na loita contra a mudanza climática. A pesares da súa importancia, este sector está a sufrir un abandono gradual debido a varios factores, incluíndo o abandono rural, o envellecemento da poboación, baixos prezos e problemas de pragas e enfermidades. A súa supervivencia é vital para a economía local e a preservación da paisaxe galega. Este ano, a situación tense complicado aínda máis debido ás condicións climáticas. O clima seco e a caída prematura das follas e ourizos afectaron as perspectivas dunha boa colleita. A situación tamén afectou ás comercializadoras, xa que Galicia non produce abondo castañas para satisfacer a demanda da súa propia industria. A castaña galega é un recurso natural, económico e cultural incalculábel que require protección e apoio, motivo polo que desde Interior Galego Vivo, demandan medidas específicas para protexer este sector que consideran vital:
- Axudas económicas para os produtores que sufriron perdas nos últimos dous anos.
- Conceptualización de «souto tradicional» para diferenzialo de soutos de nova plantación.
- Axudas e liñas de actuación para a recuperación de soutos tradicionais, tendo en conta a súa distribución xeográfica.
- Liñas de financiamento para mecanización das tarefas nos soutos, creación de novos soutos con variedades resistentes a enfermidades, e procesos de transformación.
- Campañas de promoción do produto para incrementar o seu consumo e poñer en valor a IXP «Castaña de Galicia».
- Controis estritos para garantir que os produtos co selo «de castaña» conteñan unha alta porcentaxe de castaña en súa composición.
A castaña galega é un tesouro que merece protección e apoio. Só cunha xestión adecuada e medidas de apoio, poderemos preservar este recurso natural e cultural que é fundamental para Galicia.•
