O sector vitivinícola galego recibe un impulso significativo co anuncio da publicación, a pasada semana no Diario Oficial de Galicia (DOG), da orde que establece as bases reguladoras para as achegas destinadas á reestruturación e reconversión da viña na nosa comunidade. Un orzamento de 4 millóns de euros abre unha nova etapa na modernización e fortalecemento deste sector clave da economía galega. Estas axudas teñen un obxectivo claro: mellorar a competitividade das explotacións vitícolas, adaptar o cultivo do viñedo aos desafíos do cambio climático e fomentar prácticas máis sustentables dende o punto de vista medioambiental. A reestruturación do viñedo é un paso esencial neste camiño, e as achegas propostas centraranse na reconversión varietal, incentivando a substitución de viñas antigas por variedades autóctonas, máis resistentes e que produzan viños de maior calidade e demanda no mercado.
As persoas viticultoras, xa establecidas ou futuras, que teñan viñedos dedicados á produción de uva para vinificación e cumpran cos requisitos estipulados, poderán acceder a estas axudas. O tamaño máximo para as solicitudes individuais é de 0,2 hectáreas, mentres que as solicitudes colectivas poden chegar ata 1 hectárea.
Desde o ano 2018, estas achegas veñen sendo unha constante, destinando preto de 14 millóns de euros ao longo de cinco anos para modernizar e revitalizar o viñedo galego. Entre 2018 e 2023, máis de 900 persoas foron beneficiarias deste programa, actuando sobre unha superficie de máis de 1.200 hectáreas.
A recente convocatoria asignou un investimento total de 4 millóns de euros, permitindo a reconversión de 315 hectáreas de viñedo e beneficiando a 179 persoas. Este orzamento reforzará a competitividade do sector e a impulsar unha produción vitivinícola galega de alta calidade e sustentabilidade.
O prazo para presentar solicitudes esténdese ata o 26 de abril, ofrecendo unha oportunidade para que as persoas viticultoras galegas accedan a este apoio e impulsen a modernización do viñedo na comunidade.•
Cargando ...
