O Diario Oficial de Galicia (DOG) anunciou esta pasada semana as resolucións das axudas para investimentos na elaboración e comercialización de produtos vitivinícolas, xunto coa promoción nos mercados en terceiros países, correspondentes ao ano 2023. Este investimento totaliza 7,5 millóns de euros, financiado polo Fondo Europeo Agrícola de Garantía Agraria.
Estas axudas, que beneficiaron a un total de 53 destinatarios, reflicten un forte apoio ao sector vitivinícola galego, crucial para o desenvolvemento rural. O incremento do orzamento, especialmente na elaboración e comercialización, posibilitou atender todas as solicitudes que cumprían os requisitos.
As axudas para elaboración e comercialización teñen como obxectivo fomentar a agrupación e asociacionismo agrario, así como impulsar procesos sustentables e a certificación ambiental. Tamén se promove a innovación, o aumento da dimensión empresarial e a introdución de tecnoloxías dixitais.
Para a promoción en terceiros países, buscan ampliar os mercados e reforzar a competitividade dos viños galegos. As accións inclúen campañas publicitarias, misións comerciais e promocións en puntos de venda.
Dende 2018, o Goberno autonómico destinou uns 26,7 millóns de euros a estas liñas de apoio, consolidando unha sólida colaboración co sector vitivinícola.•
