A Comisión de Seguimento do proxecto de ampliación e mellora do sistema de tratamento de auga potable de Monforte de Lemos reuníase nos pasados días na cidade do Cabe coa presenza de representantes de AcuaNorte, Xunta de Galicia e Concello de Monforte, as tres institucións que promoven esta importante actuación.
PRAZOS DESTA OBRA
O goberno local informou de que os integrantes da Comisión de Seguemento constataron que o proceso segue os pasos previstos, que se están a cumprir os prazos marcados, e que se realizan os trámites correctos dun proxecto que continúa en exposición pública dende o día 5 de novembro. Actualmente realízanse xestións coa Xunta de Galicia encamiñadas a conseguir a declaración de urxente ocupación dos terreos e bens que serán destinados á construción da nova potabilzadora. As previsións da Comisión de Seguimento estiman que no mes de abril do vindeiro ano 2012 poidan iniciarse as obras de execución do proxecto que dotará a Monforte dun novo sistema de tratamento de auga potable.
CARACTERÍSTICAS DESTA ACTUACIÓN
As obras que contempla o citado proxecto son, por unha parte, a construción dunha nova ETAP en Ribasaltas con capacidade de 200 litros por segundo; a construción dun novo depósito en Ribasaltas con capacidade de 3.500 metros cúbicos; unha nova central de bombeo en Ribasaltas con caudal para 200 l/s; unha nova condución de impulsión entre a ETAP de Ribasaltas e o depósito do monte do Cornado. Por outra banda, o convenio prevé a mellora das conexións en depósitos de San Vicente mediante a instalación de válvulas de control automático de enchido, así como a regulación no depósito de Piñeira a través da instalación dunha válvula para regulación do nivel do depósito. Segundo anunciaron os responsables do proxecto, o custe total da actuación ascende a 5,4 millóns de euros.
Cargando ...
