O deputado do Grupo Popular Jaime Castiñeira dixo no Parlamento que a Xunta de Galicia inaugurará este ano o primeiro tramo do corredor Sarria-Monforte, “e está previsto que ao longo do vindeiro ano estea totalmente rematada e operativa esta vía”. Jaime Castiñeira confirmou que a Xunta está a traballar na construción deste corredor, que considerou “un proxecto fundamental para a mellora das comunicacións por estrada na provincia de Lugo e que compartimos a demanda de que a obra se axilice o máximo posible”. Estas declaracións viñan a raíz da denuncia por parte do grupo parlamentario do PSOE de que o Goberno galego está a incumprir os prazos previstos para este ano na posta en marcha desta vía.
PROBLEMAS XEOTÉCNICOS MOTIVARON REFORMAS NOS PROXECTOS
Castiñeira negou que as obras se paralizaran e explicou que unicamente “leváronse a cabo reformas do proxecto e de contratos nos dous últimos tramos, como consecuencia da aparición de problemas xeotécnicos e de estabilidade dos terreos polos que discorre este corredor”. O deputado popular criticou aos socialistas “por querer apropiarse dun proxecto que pertence claramente aos gobernos do Partido Popular” e dixo que a primeira fase Nadela-Sarria foi licitada, contratada e iniciadas as obras polo goberno de Manuel Fraga, sendo vicepresidente daquel executivo Alberto Núñez Feijóo. Neste sentido, recordou ao deputado socialista Pablo López, quen levou a proposición non de lei para axilizar esta segunda parte do corredor o pasado 8 de marzo, as manifestacións que tiveron lugar na zona de Sarria entre os anos 2003 e 2005, reclamando a conversión do corredor previsto inicialmente en autovía, “unhas protestas que, curiosamente, remataron tan pronto chegou o Goberno bipartito sen cambiar un ápice o deseño previsto desta obra”. O deputado popular tamén afirmou na sesión que o anterior presidente da Xunta, o socialista Emilio Pérez Touriño, xunto coa daquela conselleira de Infraestructuras María José Caride, visitaron no 2008 as obras do tramo Nadela-Sarria e anunciaron a súa inauguración ese mesmo ano. “Lamentablemente, non se cumpriu este anuncio e tivo que ser o goberno de Núñez Feijóo quen rematou as obras e puxo en funcionamento este tramo do corredor”, sinalou Castiñeira.
PROPOSICIÓN NON DE LEI DO PSOE
O portavoz de Infraestruturas do Grupo Socialista, Pablo López Vidal, denunciaba na mesma sesión o “incumprimento flagrante” de Feijóo co seu compromiso de rematar a Vía de Alta Capacidade Sarria-Monforte. Así o dixo no debate da proposición non de lei para que a Xunta execute este “compromiso fallido” que resulta “vital” para o desenvolvemento da provincia de Lugo. López Vidal, pola súa parte, acusou ao presidente da Xunta de ter esta obra paralizada por outros motivos diferentes aos que alegou Castiñeira: “Non pagar as certificacións de obra á empresa, poñendo a 200 persoas no paro, adiando sine die unha obra xa adxudicada e prevista para finais do pasado ano 2011”, dixo López Vidal. Reclamou “honestidade” ao PP para “dicir a verdade de que van ser incapaces de rematar un corredor de só 28 quilómetros” porque “o seu presidente non ten palabra”. O responsable socialista dixo contrariamente ao popular, que foi o goberno socialista o que decidiu licitar esta obra e completala ata conectar o eixo Nadela-Sarria-Monforte, mellorando a mobilidade e facilitando a comunicación coa capital da provincia. Sen embargo, dixo, “o actual presidente da Xunta paralizou as obras incumprindo os compromisos adquiridos para o desenvolvemento das grandes infraestruturas de Galicia”.
IMPORTANCIA “VITAL” DESTA INFRAESTRUTURA
López Vidal alientou a “importancia vital” da infraestrutura para a mellora da seguridade viaria, a calidade dos desprazamentos e o tempo de conexión entre Monforte, Sarria e Nadela-Lugo, e polo tanto para mellorar a competitividade e o desenvolvemento. A iniciativa debatida o pasado 8 de marzo contemplaba o remate da obra nos primeiros seis meses de 2012, logo de que a Xunta incumprira, segundo remarcaron os socialistas, o contrato orixinal para finalizar a infraestrutura a finais de 2011.
ENMENDA DO PSOE
López Vidal desbotou unha emenda do PP para supeditar a execución ás “dispoñibilidades orzamentarias” e cualificou esta proposta do goberno galego de “broma de mal gusto” para “enganar metendo a obra nunha partida orzamentaria que non se vai executar”.
