•A conselleira de Medio Rural visitou en Quiroga unha plantación e dúas empresas de aceite autóctono e viño

O pasado 12 de abril, a conselleira de Medio Rural e Mar, Rosa Quintana, visitou Quiroga e coñeceu de primeira man os traballos vinculados á produción de aceite autóctono, así como doutros produtos da comarca. Acompañada polo secretario xeral de Medio Rural e Montes, Tomás Fernández-Couto, e o alcalde de Quiroga, Julio Álvarez, a titular autonómica achegouse a unha plantación de oliveiras, e salientou a “importancia destas iniciativas cara a diversificación dos usos do monte e o seu correcto aproveitamento”, ademais da súa contribución na loita contra os incendios forestais.

QUIROGA, MODELO DE SOSTIBILIDADE RURAL

Asimesmo, a conselleira de Medio Rural felicitou ao alcalde, Julio Álvarez, polo “esforzo realizado neste concello para recuperar e poñer en valor esta tradición”, ao tempo que manifestou a súa confianza en que “este exemplo teña o seu reflexo en máis municipios rurais”. Durante a súa estancia en Quiroga, Rosa Quintana visitou tamén as instalacións de dúas empresas adicadas a servizos medioambientais e a estruturas metálicas, cuxa posta en funcionamento contou co apoio do Grupo de Desenvolvemento Rural (GDR) Ribeira Sacra, que os financiou cunha achega total de máis de 362.000 euros. Asimesmo, a conselleira visitou a empresa de elaboración de aceite autóctono Aceiroga, que este ano prevé producir entre 1.000 e 1.300 litros, e a adega Mondelo, que conta con dúas hectáreas de viñedo da Denominación de Orixe Ribeira Sacra, e unha produción anual aproximada de 25.000 litros.

LIÑA DE AXUDAS PARA PROMOCIÓN DO VIÑO GALEGO FÓRA DE EUROPA

En relación coa produción vitivinícola, a titular de Medio Rural anunciou a publicación das achegas que a Xunta Xunta destina este ano á promoción do viño galego en mercados de fóra da Unión Europea. As axudas, por valor de máis de 1,8 millóns de euros e cofinanciadas polo Fondo Europeo Agrícola de Garantía, teñen como obxectivo aumentar a información sobre os produtos galegos (neste caso o viño) en países terceiros, así como a súa comercialización mediante diversos programas e actividades de promoción. Asimesmo, estas axudas buscan poñer en valor a excelencia das nosas producións e facilitar a súa saída nos diferentes mercados, tanto dentro como fóra de Galicia.