Na primeira fin de semana de maio, preto de 20.000 persoas seguiron esta proba

A organización destacou a excelente acollida desta primeira edición por parte dos 36 pilotos participantes, e as felicitacións da Federación Galega de Automobilismo polo desenvolvemento da proba

Monforte xa conta con proba automobilística propia. A primeira fin de semana de maio disputouse a I Subida Terra de Lemos, organizada pola Escudería Terra de Lemos e co apoio de preto de 200 pequenos colaboradores, tres patrocinadores e a aportación do Concello de Monforte, Deputación de Lugo e Xunta de Galicia. No aspecto organizativo, o evento contou co saber facer e a experiencia da Escudería Chantada, á que manifestaron o seu agradecemento os organizadores. Moi satisfeitos e sorprendidos pola participación, “xa que normalmente nunha subida nova non se conta con máis de 20 inscritos, e nós tivemos 36”, os da Escudería Terra de Lemos xa pensan na segunda edición, según explicou Eloy Pérez, secretario da agrupación. “Foi moitísimo traballo, pero é certo que recibimos as felicitacións dos pilotos, do comercio, e os hoteis estiveron ó cen por cen de ocupación”, suliña Pérez, que apuntou que tecnicamente a proba foi perfecta. “Na Federación dixéronnos que dificilmente íamos poder mellorar o ano que ven, porque foi unha carreira moi limpa”. De público non se puideron queixar: a Federación estima que do 4 ó 5 de maio preto de 20.000 persoas déronse cita en Monforte para o bautismo de neumático desta prometedora iniciativa deportiva.