O edificio administrativo da Xunta en Lugo acolle a exposición “Visións”, unha mostra colectiva que nace con vocación itinerante, disposta a percorrer os concellos da provincia que soliciten a súa acollida. Organizada polo Grupo Cinematográfico Fonmiñá, a mostra reúne a obra de sete fotógrafos lucenses: Miguel Calvo, Luis Engroba, Fernando Gago, José Manuel Guisasola, Méndez, Eduardo Ochoa e Xosé Manuel Otero. A exposición “Visións” integra tres obras representativas do traballo de cada fotógrafo, en formatos e estilos que van dende a sobriedade do branco e negro ata a singularidade cromática da fotografía traballada con medios dixitais. A mostra está aberta de luns a venres de 9 a 20 horas, e os sábados de 9 a 14 horas, ata o 20 de decembro.
