Eixo de actividades culturais, comerciais e sociais en torno ó mundo do viño da Ribeira Sacra

•O Museo do Viño, instalado no espazo expositivo deste recinto, recibiu máis de 17.000 visitantes • A súa vinoteca, con 196 referencias de viños e licores, é o punto de venta con máis marcas da Denominación de Orixe Ribeira Sacra

O Centro do Viño de Monforte vén de cumplir cinco anos en plena forma como centro de referencia do mundo e da cultura vitivinícola da Ribeira Sacra. O primeiro paso nesta andaina foi a recuperación e remodelación do edificio número 6 da rúa Comercio. Unha construcción con historia, xa que a mediados do século XVIII fora hospital, para converterse cen anos despois en casino, antes de acoller, nos anos trinta do século XX, a sede da Casa Consistorial monfortina. A súa céntrica ubicación no casco histórico da cidade do Cabe, e as singularidades arquitectónicas do edificio, cun excepcional claustro interior enmarcado cunha fermosa galería, facilitaron a posta en marcha deste proxecto impulsado polo Concello de Monforte.

EPICENTRO DA CULTURA DO VIÑO

O Centro do Viño integra un espazo museístico, o proxecto estrela da recuperación deste inmoble, concebido seguindo as tendencias máis vangardistas do deseño expositivo. Audiovisuais, fotografía e unha singular disposición dos elementos divulgativos ofreceron ós máis de 17.000 visitantes recibidos unha visión moi actual e suxerente da cultura vitivinícola e do espíritu da Ribeira Sacra. O coñecemento directo do viño desta zona é posible na área de cafetería e vinoteca, integradas no edificio, e a labor divulgativa compleméntase cunha zona de exposicións na galería que rodea o claustro, e unha zona de traballo para acoller todo tipo de eventos relacionados co viño, e o seu estudio e divulgación.

NOVO IMPULSO

Esta liña de traballo vén de reforzarse dende hai 10 meses, cando a empresa Rutas Sacras Nomar asume a xestión do Centro do Viño. Iníciase unha nova etapa en canto ó aproveitamento deste espazo, xa que a Oficina de Turismo pasa a localizarse nestas dependencias, con máis de 10.000 consultas atendidas durante este periodo. Pero ademais de atender ós visitantes, o Centro do Viño apostou por ser o centro de dinamización da vida local, e con este fin estase a realizar unha intensa programación de eventos ó longo de todo o ano. Os xoves son os días consagrados ó coñecemento do noso viño; os adegueiros presentan os seus viños e propoñen unha cata-degustación ós asistentes, nunha actividade que deu a coñecer 41 viños de 27 adegas da Ribeira Sacra. A vinoteca é o espazo comercial con máis referencias da Denominación de Orixe. Esta tenda dispón de 196 referencias entre viños e licores das cinco subzonas, e ofrece servizo a domicilio a calquer punto de España. A proposta do Centro do Viño conta tamén con cursos de cata de viños e uvas, exposicións e conferencias, eventos festivos e obradoiros de fotografía e artesanía, para reivindicar ó viño como o centro da nosa identidade.•