A Asociación Veciñal San Fiz de Cangas, no municipio de Pantón, contará co apoio da Área de Deportes da Deputación para manter a tradición do xogo de birlos.
CAMPO DE HERBA NATURAL QUE PRECISA COIDADOS CONSTANTES
A mediados deste mes, o deputado de Deportes, o nacionalista Efrén Castro, achegouse a esta parroquia para reunirse cos responsables deste colectivo veciñal. Castro comprometeuse a facilitar o mantemento do campo de xogo, anexo ao local social deste colectivo. O campo é unha superficie de herba natural que esixe un coidado continuo para poder practicar este deporte tradicional. O xogo dos birlos ten regras específicas en diversas áreas de Galicia, con especial arraigo nesta parroquia pantonesa, que ten liga propia dende 2007.
XOGO TRADICIONAL QUE REÚNE A DIFERENTES XERACIÓNS
O nacionalista Efrén Castro afirmou en Pantón que «se tramitará unha achega para que a asociación poida adquirir un cortacéspede que facilite o mantemento do campo e a continuidade deste xogo tradicional», resaltando a importancia desta modalidade deportiva «capaz de reunir a diferentes xeracións».
Na visita que Efrén Castro realizou a Pantón este mes, reuniuse co alcalde, José Luis Álvarez, para abordar a posibilidade de que a Área de Deportes da Deputación colabore na mellora do pavillón deportivo. Este espazo acollía, ata que comezou a pandemia, as actividades das escolas deportivas municipais, e os encontros que organizan os colectivos veciñais.•
