• A licitación do proxecto sae cun coste de 163.398,41 euros, o prazo de presentación de ofertas estará aberto ata o 21 de maio e terá un período aproximado de execución de 3 meses
O concello de Monforte segue a traballar no desenvolvemento urbanístico da chamada Zona C, cunha intervención sobre máis de 21.000 metros cadrados situados na marxe dereita do Cabe, coa que cse ambiará substancialmente a fisionomía da cidade. E nesta liña o Alcalde de Monforte, José Tomé Roca, acompañado pola 1ª Tenente de Alcalde, Gloria Prada, e o Concelleiro de Obras, Medio Rural e Servizos, veñen de dar a coñecer o proxecto de mellora da actual rúa Rof Codina, que contribuirá a complementar ás actuacións incluídas no proxecto de urbanización da Zona C.
PROXECTO DA ZONA C
“Para completar o proxecto da Zona C, consideramos que é necesario, actuar tamén na rúa Rof Codina, dende a Avenida de Galicia ata a nova zona urbanizada, onde os traballos están xa moi avanzados no que se refire ós desescombros, regularización do conxunto do terreo, e tamén xa se poden apreciar os novos viais e beirarrúas”, sinalou o Alcalde. “Trátase dunha obra necesaria dentro do proxecto da Zona C que, como saben, consiste na urbanización da zona do centro da cidade que se ubica entre a rúa Rof Codina e o Barrio de Cobas, e entre a Rúa Ourense e o Río Cabe, moi próxima ó conxunto monumental dos Escolapios”.
A RÚA ROF CODINA TERÁ SAIDA Ó TRÁFICO
Os novos traballos permitirán que a Rúa Rof Codina, que ata o de agora era unha rúa sen saída, deixe de ter esta limitación unha vez rematen as obras de mellora anunciadas polo Alcalde, quen sinalou que “o proxecto de urbanización da Zona C conleva a apertura dunha vía pública que dea saída á rúa Rof Codina, resolvéndose así o problema desta rúa sen saída”.
Na actualidade, esta rúa consta dunha calzada central e dúas beirarrúas peonís en ambos lados. A súa lonxitude é de 87 metros, e conta cun ancho medio de 9,15 metros.
As súas beirarrúas peonís son moi estreitas, entre 1 e 1,15 metros, e a calzada consta dun carril central de dobre sentido, o que dificulta moitas veces a entrada e saída de vehículos, e aparcamentos a ambos lados. As beirarrúas son de baldosas con bordillo de formigón, e a calzada é de aglomerado asfáltico.
En canto ós servizos desta rúa Rof Codina, as redes de abastecemento e saneamento están renovadas pola súa marxe esquerda, pero están defectuosas na súa marxe dereita.
As instalacións de alumeado público, alta tensión e telecomunicacións son aéreas, polo que a través deste proxecto procederase ó seu soterramento, igual que na nova zona urbanizada. Deste xeito, haberá unha circulación fluída, evitando entronques dificultosos e simplificando o tráfico o máis posible, dando unha solución semellante á travesía Veiguiña ou á rúa Germán Vázquez, o cal redunda na seguridade dos peóns.
LICITACIÓN E PRAZOS DE EXECUCIÓN
Este proxecto ten un custe de licitación de 163.398,41 euros (IVE engadido), e publicouse na Plataforma de Contratos do Sector Público, o pasado luns día 25 de abril, polo que o prazo de presentación de ofertas será de 26 días naturais e estará aberto ata o sábado 21 de maio.
A mesa de contratación celebrarase o luns 23 de maio, e unha vez adxudicada e asinada a acta de replanteo, esta obra contará cun período aproximado de execución de 3 meses, en consonancia co remate das obras da Zona C.•
Cargando ...
