• A seca está a provocar as primeiras restricións e dificultades na subministración de auga en Sober, Pantón, Ribas de Sil ou Taboada
Galicia rexistrou un mes de xullo moi seco no que respecta ás precipitacións e extremadamente cálido en canto ás temperaturas, cunha vaga de calor histórica entre os días 11 e 15, segundo conclúe o avance do último informe climatolóxico de MeteoGalicia. A anomalía media da temperatura para este mes foi de +2,7 ºC. As temperaturas máximas (+3,9 ºC) foron extremadamente cálidas mentres que as mínimas (+1,54 ºC) foron moi cálidas. Tanto nas máximas como nas medias a anomalía en xullo foi a máis elevada da serie desde 1981.
O valor medio das temperaturas máximas foi de 28,1 ºC. As máis altas rexistráronse na nosa comarca, no Miño ourensán e na comarca de Verín, con valores próximos aos 36 ºC.
No que respecta ás precipitacións, a anomalía media foi un 66% inferior ao valor normal. As chuvias foron escasas e o seu reparto foi moi desigual porque a maior parte das precipitacións tiveron un carácter convectivo. A precipitación media acumulada foi de 11 l/m2, rexistrándose as maiores acumulacións na Terra de Lemos con valores que puntualmente acadaron os 82 l/m2.
Esta situación climatolóxica está a xerar unha seca que ten ao embalse de Vilasouto ao 33% da súa capacidade. Varios concellos da comarca estanse vendo obrigados a tomar medidas, tal é o caso de Pantón, onde se decidiu cortar a subministración de auga entre as 24 horas e as 6 da mañá. Ou Sober que está agora mesmo facilitando cisternas de auga a varios pobos que non contan con traída municipal senón con traídas veciñais nas que escasea o subministro. “Mentres uns teñen problemas outros malgastan a auga con regos descontrolados ou enganches ilegais o que é ilóxico”, resume o rexedor, Luis Fernández Guitián. Pero tamén en Ribas de Sil e Taboada están a sufrir restriccións, tendo prohibido o rego de hortas e xardins, así como o enchido de piscinas e lavado de coches. •
Cargando ...
