O Alcalde e candidato á reelección subliñou no mitin que ofreceu o día 18 acompañado do Delegado do Goberno en Galicia ante centos de persoas que Monforte “cambiou como da noite ó día e, por primeira vez en moitos anos, avanza e medra en todos os parámetros económicos e sociais” porque os socialistas “temos un proxecto claro, ambicioso, á altura do que o noso concello necesita e do que merece”
. “Monforte cambiou como da noite ó día e, por primeira vez en moitos anos, avanza, medra en todos os parámetros económicos e sociais. Atraemos investimentos, empresas, aumentan as prestacións sociais, melloramos os servizos públicos, as comunicacións, as infraestruturas, o polígono industrial, os parques, as zonas verdes, o saneamento e o abastecemento, entre outras moitas actuacións”. Así o manifestou o Alcalde de Monforte de Lemos e candidato á reelección polo PSdeG, José Tomé Roca, no mitin que ofreceu este xoves, un encontro que reuniu no restaurante Manuel Bistró a centos de persoas, ante as que o rexedor subliñou que Monforte “está nunha boa racha e vai ben”, porque “os socialistas temos un proxecto claro, ambicioso, á altura do que o noso concello necesita e do que merece”.
Xunto a toda a súa candidatura, e acompañado do Delegado do Goberno de España en Galicia, José Ramón Gómez Besteiro, así como da Deputada provincial, Secretaria de Organización do partido na provincia e candidata á Alcaldía de Antas de Ulla, Pilar García Porto, entre outros responsables orgánicos, e alcaldes e candidatos da comarca, José Tomé mostrou o seu “inmenso orgullo de ser o Alcalde de Monforte e a honra de ser o candidato do Partido Socialista, para seguir sendo o Alcalde de todos, como veño demostrando durante toda a miña etapa de Goberno, porque creo profundamente nos valores que defendemos e creo profundamente en Monforte, esta terra que me deu case todo e que tanto quero”.
Máis do dobre de investimentos en servizos sociais
O tamén Presidente da Deputación e Secretario Xeral do PSdeG na provincia de Lugo fixo nalance dos fitos conseguidos nos últimos 8 anos, “moi positivos para Monforte, sobre todo neste último mandato”, destacando o “crecemento económico e social”. En servizos sociais “duplicamos o gasto en relación co ano 2015”, pasando de 933.000 euros a 1.880.000 euros neste 2023”, o que supuxo poñer en marcha axudas que non había ou incrementalas notablemente, como por exemplo o SAF, eficiencia enerxética, becas para libros de texto, o convenio con Cáritas, o programa Xantar na casa, ou axudas ó transporte de estudantes.
Avances en urbanismo, medio ambiente, parques e deporte
En materia de urbanismo e infraestruturas, explicou que nestes 8 anos “arranxamos máis de 180 rúas, temos contratadas outras 13 e 3 máis en licitación; urbanizamos a Zona C entre Rof Codina e Covas, cambiando unha selva por unha zona ben urbanizada; na zona rural arranxamos nas 26 parroquias 325 camiños e pistas; e case non quedan rúas, nin pistas sen arranxar, o que da unha boa mostra do esforzo que fixemos”.
No eido medioambiental, tamén “foron moitas as obras de mellora”, con saneamentos en Valle Inclán, Calvo Sotelo, Pontillón, Chantada, Santa Clara-Veiga, Juan Montes e Padre Feijóo, supresión de vertidos xunto ó Club Fluvial e en Aceña Nova; en licitación o Colector Xeral dende o Cardenal ata Carude, e tamén a nova depuradora do polígono; a realización do estudio xeral de toda a rede de saneamento da cidade incluída a depuradora de Piñeira; estase redactando o proxecto para arranxar o colector en Dtor. Casares, Concepción Arenal e Rosalía de Castro, “e hai máis cousas en carteira”.
O Alcalde destacou a execución ou mellora de 7 parques: Compañía; Casas Baratas; Parque de Covas; Parque da Gardería; López Suárez; Rúa Santiago e Parque do Hospital.
En canto a instalacións deportivas, as obras máis importantes foron as seguintes: vídeomarcadores no campo da Pinguela e Luis Bodegas; rexeneración do terreo de xogo do campo da Pinguela; renovación dos campos de fútbol Luis Bodegas e Calasancio con céspede artificial; renovación e iluminación do Luis Bodegas por led de baixo consumo nos dous campos; dotación de iluminación led ó campo da Pinguela e gradas de público, así como a dotación de subministro eléctrico propio xa que antes non o tiña; renovación da iluminación do pavillón da Pinguela por led de baixo consumo, tanto na pista deportiva como no resto da instalación (gradas, vestiarios, etc.); instalación de vídeomarcador no pavillón da Pinguela; e pista de skate e pista polideportiva da Compañía. Actualmente, trabállase na renovación integral do pavillón da Pinguela.
Dun polígono “abandonado” a atraer grandes empresas
Polo que respecta á actividade industrial, José Tomé lembrou que, cando chegou á Alcaldía, o polígono do Reboredo “estaba abandonado e as parcelas cheas de maleza e sen vender”. “Conseguimos melloralo arranxando as rúas, fixemos viais novos e puxemos a iluminación led, de tal xeito que hoxe xa están vendidas todas as parcelas”, recalcou.
O rexedor socialista puxo en valor o logro da implantación en Monforte de Kern Pharma, “cun investimento de máis de 60 millóns de euros e máis de 100 postos de traballo directos, que nos coloca no mapa das empresas tecnolóxicas”, e do Centro de Competencias Dixitais ou Ciberseguridade de Renfe, “que xa empezou a funcionar e tamén vai crear máis de 100 postos de traballo directos”.
Así mesmo, avanzou que hai “outro proxecto empresarial moi importante que vai investir 10 millóns de euros e que vai crear en torno a 50 postos de traballo directos”, unha iniciativa “que anunciarán pronto os seus promotores”.
Proxectos empezados “que van marcar o vindeiro mandato”
Polo tanto, subliñou, “fixemos moitas cousas, pero temos moitas máis que ofrecer”. De feito, “xa estamos empezando moitos proxectos que van marcar o próximo mandato”, como a praia fluvial; a supresión dos pasos a nivel de Rioseco e Juan Montes; a sinatura dun convenio co Ministerio de Transportes para rematar a Ronda Urbana, entre a rúa Ourense e a N-120, que incluirá a mellora da recta de Distriz para dotala de máis seguridade; ou a mellora do enlace da N-120 coa estrada do polígono industrial, facendo dúas rotondas e os carrís de subida e de baixada.
Anunciou tamén como programa de Goberno o inicio dos trámites para a mellora da Muralla de San Vicente; continuar co bus urbano público e gratuíto para todos; a renovación da piscina municipal climatizada; a urbanización da Zona D, xunto ó Banco de Bilbao e o Parque dos Condes; a ampliación do polígono para seguir atraendo industrias “e converternos nun polo de desenvolvemento”; o remate da nova tubería xeral de abastecemento de auga potable; a construción da nova depuradora do polígono para que teña capacidade para a ampliación; e a posta en marcha dun novo servizo de transporte público e gratuíto ás parroquias.
“Seguirei traballando xunto co meu equipo, coa mesma ilusión, enerxía, compromiso e dedicación para que Monforte siga progresando nesta nova etapa que empezamos o próximo día 28 de maio. Monforte merece o mellor e nós queremos seguir traballando para conseguilo”, subliñou o Alcalde.
