Durante un encontro co goberno municipal, Ana Pontón expuxo a necesidade de apoio económico para garantir servizos esenciais nun concello infradotado
Durante a súa visita ao concello de Samos, a portavoz nacional do BNG Ana Pontón mantivo un encontro co goberno municipal liderado pola alcaldesa María Jesús López para abordar as principais preocupacións do municipio, centrando a atención no financiamento dos servizos públicos, en particular nas vivendas comunitarias.
Pontón expresou a necesidade urxente de que a Xunta de Galicia aumente a súa implicación económica na financiación das vivendas comunitarias e do apartamento tutelado de Samos. Actualmente, o concello atópase na situación de ter que cubrir unha parte dos gastos con orzamentos municipais debido á insuficiente contribución do Goberno de Rueda.
A líder nacionalista sinalou que o dereito á vivenda é esencial e que é responsabilidade da Xunta garantir este dereito, especialmente para aqueles que teñen algún tipo de necesidade especial. Samos conta con dúas vivendas comunitarias para a terceira idade e un apartamento tutelado, situados no mesmo edificio, onde se comparten servizos comúns como comedor, sala de estar, lavandería, persoal e gastos. Pontón cualificou estas vivendas como un “caso paradigmático” dos problemas financeiros que enfrontan os concellos, que ás veces se ven obrigados a asumir custos de servizos que non son da súa competencia. A líder do Bloque Nacionalista Galego tamén denunciou a discriminación financeira que sofren os concellos do rural, especialmente os máis pequenos, que se atopan infrafinanciados e que adoitan asumir competencias que realmente deberían ser da Xunta, co fin de mellorar o nivel de vida dos seus veciños. Ademais das vivendas comunitarias, o concello de Samos tamén soporta custos de xestión doutras áreas que non lle corresponden, como a limpeza, o mantemento do ascensor e da caldeira do centro escolar, así como a contratación dun técnico de turismo.
A alcaldesa María Jesús López destacou que a Xunta “é especialista en botar balóns fóra” e cargar de responsabilidades aos concellos sen proporcionarlles o financiamento adecuado, como sucede co SAF (servizo de atención no fogar). Durante a visita da portavoz nacional do BNG, trasladou todas estas preocupacións ao goberno local en relación á xestión do concello de Samos.•
Cargando ...
