Redacción-Chantada
O primeiro pleno celebrado no Concello de Chantada despois das pasadas eleccións municipais deixou un punto, que non incluía a orde do día, máis que claro: o mandato de Manuel Varela para os vindeiros catro anos non se presenta nada doado. E é que no pleno de organización, as propostas que non foron modificadas polos demais grupos políticos, quedaron sobre a mesa. Así por exemplo, o goberno local prantexou a posibilidade de realizar os plenos cada dous meses, pero finalmente, con toda a oposición en contra quedou fixada unha periodicidade mensual. E o mesmo ocorreu coa creación e composición das comisións informtativas e da Comisión Especial de Contas, que ao non contar con ningún voto favorable, quedaron constituídas segundo prantexou a oposición.
Asimesmo, como consecuencia de todo isto, tamén quedaron sobre a mesa as remuneracións por asistencia a pleno e comisión municipais, e a designación de representantes do Concello nos órganos colexiados (puntos que foron tratados no pleno celebrado ao peche desta edición, o xoves 14 de xullo ás oito da tarde). Dende o Partido Socialista, José Manuel Ledo criticou que o alcalde non realizara unha reunión previa ao pleno “para tratar todos estes asuntos e chegar á sesión plenaria con certos acordos”. Críticas ás que Manuel Varela respostou dicindo que “ata o momento do pleno non estaban designados os voceiros”. Finalmente, tampouco houbo ningunha proposta en relación ao soldo do alcalde nin dos concelleiros independentes. En canto á composición dos grupos políticos e do goberno local, quedaron definidos os voceiros de cada partido así como as áreas de cada concelleiro. Deste xeito, José Castor Novoa será o primeiro tenente de alcalde e ocuparase de Educación, Deportes, Medio Ambiente e Medio Rural. María Cándida Carnero, como segunda tenente de alcalde ocuparase de Servizos Sociais, Igualdade e Participación Cidadá. Manuel Diéguez Carballo será o terceiro tenente de alcalde e o encargado de Cultura, Eventos, Emprego e Patrimonio. Por último, Pamela Fernández Águila será a cuarta tenente de alcalde e ocuparase das áreas de Saúde Pública, Comercio e Turismo e Xuventude.
Cargando ...
