Fallo do xurado do Premio Fiz Vergara de poesía en Sarria

O XII Premio de Poesía Fiz Vergara Vilariño recaeu na obra presentada baixo o lema “Abecedario póstumo”, do que resultou ser autora Cristina Ferreiro. O xurado, formado por Antía Otero, Estevo Creus, Francisco X. Fernández Naval, Francisco Pérez e María Casar, destacou esta obra “polo seu ritmo, por tratarse dunha peza non compartimentada, na que estamos ante un poema longo que inclúe textos de prosa poética e no que se reflicte a contemporaneidade máis actual. É, en certa medida, unha testemuña deste momento histórico, non como denuncia senón como receptora da realidade que vivimos. Reveladora e en certo modo visionaria. Nela trabállanse moi ben os silencios e as pausas, deixando espazos para o lector”. O xurado salientou a “enorme vitalidade” que está a amosar o Premio Fiz Vergara Vilariño, “demostrada polo número de orixinais presentados, e pola elevada calidade dos seus textos”.