A portavoz do Grupo Municipal do PP denunciou a instalación de cartelería nas árbores do entorno do Parque dos Condes

A sanidade pública segue a centrar a polémica na cidade do Cabe, nesta ocasión en torno á cartelería que a finais do mes de marzo instalou no arborado da rúa Cardeal e do Parque dos Condes a Plataforma en Defensa da Sanidade Pública (PLADESAPU) de Monforte, como medida de protesta, entre outras que está a realizar, contra a aprobación do Decreto de integración da Área Sanitaria de Lugo. Os textos e as fotografías que se reproducen nos carteis lembran a masiva manifestación do 16 de marzo pasado contra a decisión do Goberno da Xunta sobre a área sanitaria, así como as palabras que, en maio de 2010, o presidente da Xunta, Alberto Núñez Feijóo, dixo en Monforte en relación ó mantemento da Área Sanitaria propia. Palabras que tamén son recordadas por megafonía durante a concentración que, dende finais de marzo, convoca a Plataforma cada mércores na rúa Cardeal.

CRITICAN A PRESENCIA DE “INSULTOS E DESCALIFICACIÓNS” NOS CARTEIS

En relación á presencia destes carteis na paisaxe urbana, a voceira do Grupo Popular no concello de Monforte, Julia Rodríguez, presentou un escrito no Concello solicitando información sobre a existencia de licencia que habilitara a colocación de ditos carteis. Julia Rodríguez denunciou asimesmo que “estes carteis e pasquíns inclúen a imaxe do presidente da Xunta acompañada de insultos e descalificacións”, e criticou que “de tratarse de imaxes que ofenderan ó alcalde, xa terían sido retiradas”. Neste sentido, a voceira popular en Monforte destacou “a actuación exemplar dos monfortinos cando, a pesares do descontento maioritario coa tramitación do PXOM, nunca recurrimos á vexación e ó insulto contra o alcalde”. Julia Rodríguez precisou que “foron numerosos os veciños que nos trasladaron as súas queixas por estes carteis”, que, según a voceira popular, “trasladan unha imaxe de cidade sen lei”.

“REPROBACIÓN, QUE NON INSULTO OU DESCALIFICACIÓN”, Ó INCUMPRIMENTO DA PALABRA DO PRESIDENTE

En resposta a estas palabras, os responsables da Plataforma en Defensa da Sanidade Pública aproveitaron a concentración celebrada o mércores 8 de maio no Cardeal para rexeitar a consideración de “pasquíns” que a voceira popular atribúe ós carteis, “xa que non son anónimos, e as imaxes e palabras que rexistran corresponden a situacións e declaracións reais”, polo que non consideran que se estén a realizar insultos nin descalificacións, “senón que o incumprimento da palabra por parte do Presidente da Xunta merece a reprobación de todos os cidadáns”. Os voceiros de PLADESAPU emplazaron a Julia Rodríguez a “preocuparse un pouco máis, como monfortina, das listas de espera do Hospital, e de concretar dunha vez feitos consolidados e palpables sobre as novas melloras que se están a prometer co novo decreto”. Dende PLADESAPU anunciaron que, proximamente, porán en marcha novas medidas “máis drásticas”, e suliñaron que “para as concentracións do Cardeal temos todos os permisos solicitados e concedidos, cousas que parecen preocupar máis á voceira do PP que a defensa dos servizos do Hospital de Monforte”.

JULIA RODRÍGUEZ SOLICITA A RETIRADA DOS CARTEIS

Días despois, Julia Rodríguez respostou ás declaracións do alcalde de Monforte, Severino Rodríguez, en diversos medios de comunicación, cando afirmaba que a Plataforma non dispón de licencia para a colocación dos carteis de protesta. A voceira popular cualificou esta situación de “grave”, ao non cumprir a normativa vixente a este respecto, e esixiu ó equipo de Goberno municipal “que actúe para corrixir esta situación e retirar os carteis”, que considerou “unha falta de respeto ós cidadáns e un deterioro da imaxe da cidade”. A voceira popular insistiu ademais na “incuestionable” defensa que o Partido Popular está a facer polos servizos do Hospital de Monforte. “É a nosa prioridade absoluta, e seguiremos traballando para garantir a mellor asistencia sanitaria para os monfortinos”, precisou Rodríguez.