• O Concello de Monforte presentou o Programa Deportivo de Verán 2016, con actividades durante xullo e agosto. As inscricións poden realizarse nas Oficinas Municipais de Deportes e Xuventude, situadas nas Casiñas da Compañía.
CAMPUS DE XIMNASIA RÍTMICA
O Campus de Ximnasia Rítmica, organizado polo club Quicela, desenvolverase para nenos e nenas a partir de 5 anos, do 27 de xuño ao 3 de xullo, nas instalacións da Pinguela.
CAMPAMENTO DEPORTIVO DE VERÁN EN DÚAS QUENDAS NO MES DE XULLO
O Campamento Deportivo de Verán desenvolverase do 1 ao 31 de xullo, en dúas quendas de 15 días, con horario de 10 a 14 horas, para idades entre 5 e 14 anos. Durante o Campamento, que se desenvolverá nas instalaciíons deportivas de A Pinguela, realizaranse actividades multideportivas, con talleres, hípica ou piragüísmo, entre outras modalidades. Ofértanse 125 prazas para cada turno, cun prezo por quincena de 51,75 euros sen transporte, e de 67,28 euros con transporte, aínda que hai un desconto do 50% para familias numerosas. O prazo de inscrición está aberto dende o 9 de xuño, ata esgotar as prazas.
II DEPOR CAMPUS MONFORTE DO 25 AO 29 DE XULLO
En xullo tamén terá lugar o II Depor Campus Monforte, do 25 ao 29, nas instalacións dos Escolapios, organizado polo R.C. Deportivo e o C.P. Calasancio, coa colaboración do Concello de Monforte. O Depor Campus está destinado a idades entre 6 e 14 anos, cun horario de 10 a 14 horas. O prezo é de 120 euros, con diversas bonificacións.
CURSOS DE TENIS EN XULLO E AGOSTO
Entre xullo e agosto celebraranse os cursos de Tenis, os martes e xoves entre as 10 e as 13 horas, con sesións de 1 hora en grupos reducidos, para idades entre 6 e 12 anos. O programa oferta 30 prazas ao mes, cun prezo por persoa e mes de 20,70 euros, cun desconto do 50% para familias numerosas. Cada alumno deberá levar a súa propia raqueta. A formación de grupos por idades comunicarase unha vez pechadas as inscricións. Cada grupo recibirá unha hora de clase os martes e outra os xoves. O prazo de inscrición está aberto ata completar as prazas.
ACTIVIDADES GRATUÍTAS AO AIRE LIBRE
O Concello de Monforte organiza as actividades físicas ao aire libre, do 4 de xullo ao 12 de agosto, no Parque dos Condes e no Malecón. Este programa, de carácter gratuíto, inclúe tai chi, ioga e zumba, con monitores, e en horario de mañá e tarde. Non é precisa inscrición.
A INSCRICIÓN NO CAMPUS DO CELTA ÁBRESE O 20 DE XUÑO
Tamén en agosto terá lugar o X Campus de Fútbol Cidade de Monforte, organizado polo Concello de Monforte e a Fundación R.C. Celta de Vigo. Desenvolverase do 1 ao 5 de agosto, de 10 a 13 horas, no campo municipal Luis Bodegas. O Campus está dirixido a nenos e nenas de 7 a 14 anos. Ofértanse 100 prazas, cun prezo por persoa de 26,91 euros, cun desconto do 50% para familias numerosas. As inscricións ábrense o 20 de xuño.
CAMPUS DE VOLEIBOL RIBEIRA SACRA
O III Campus de Voleibol, organizado polo Club Voleibol Ribeira Sacra de Monforte, será do 8 ao 12 de agosto, de 10 a 13,30 horas, para nenos e nenas con idades de 8 a 15 anos. Desenvolverase no pavillón municipal da Pinguela. O prezo é de 30 euros por persoa.
V CAMPUS DE BALONCESTO CIDADE DE MONFORTE
Tamén en agosto terá lugar o V Campus de Baloncesto Cidade de Monforte, organizado polo Concello e o C.B. Val de Lemos. O campus desenvolverase do 22 ao 26 de agosto, de 10 a 13 horas, no pavillón municipal da Pinguela. O prezo é de 18 euros por persoa, con desconto do 50% ás familias numerosas. As inscricións ábrense o 27 de xuño.•
Cargando ...
