• A depuradora do Porto Seco de Monforte estará completada antes de rematar o vindeiro trimestre do ano. O pasado 9 de marzo, o alcalde, José Tomé, asinou o contrato coa emprega Obras y Viales de Galicia (OVIGA), encargada da construción desta infraestrutura. Segundo explicou o alcalde, está previsto que a obra dure dous meses, e que a nova estación depuradora estea rematada a finais de maio ou principios de xuño. O importe da actuación é de 255.154,05 euros, a oferta económica máis vantaxosa entre as presentadas polas 14 empresas que optaron a esta obra.
Logo da sinatura do contrato, o rexedor local acompañou aos representantes da construtora ata os terreos do Porto Seco, para analizar os pasos que se van desenvolver na obra.
José Tomé valorou positivamente a sinatura deste contrato. “Logo deste último trámite, por fin, en moi poucos meses, a plataforma loxística terá en servizo o saneamento que faltaba para que as empreseas poidan instalarse nas súas parcelas”, destacou o alcalde.

SOLUCIÓN A UN PROBLEMA PENDENTE DENDE 2011
Tomé insistiu en que a sinatura deste contrato “demostra que dende o Concello poñemos o punto final a un capítulo que durou demasiado tempo”. O alcalde lembrou a importancia de desbloquear unha situación que se mantiña dende o ano 2011, cando a Confederación Hidrográfica Miño-Sil comunicou ao Consistorio que non autorizaba a conexión do Porto Seco á rede municipal de saneamento. Co fin de resolver esta situación, en maio de 2016 o alcalde de Monforte asinou coa conselleira de Infraestruturas, Ethel Vázquez, un convenio de colaboración entre Concello e Xunta, no que acordaban financiar a medias esta infraestrutura.
“Unha vez resolto o problema do saneamento, non hai escusa para que as empresas que estaban comprometidas se instalen definitivamente no Porto Seco, unha vez que tramiten as licenzas”, declarou Tomé. Neste sentido, o rexedor local amosou a súa esperanza de que “a implantación de empresas se cumpla canto antes”. “O Concello está desexando poder conceder licenzas ás empresas que o soliciten e presenten a documentación necesaria”, precisou o alcalde.•

• O pasado 10 de marzo, a deputada autonómica do Partido Popular, Julia Rodríguez, rexistrou no Parlamento de Galicia unha proposición non de lei, na que solicita que a Xunta impulse iniciativas que permitan a promoción do Porto Seco de Monforte. Segundo destacou no seu escrito a deputada monfortina, estas iniciativas deberán contribuír a convertir o Porto Seco nun centro preferente do movemento de mercadorías por ferrocarril e en plataforma loxística, dentro do Plan de Optimización Loxística de Galicia.

“GRAN ESFORZO” DA XUNTA EN INCENTIVAR O PORTO SECO COMO “POLO DE RIQUEZA E EMPREGO”
No documento presentado á Cámara galega, Julia Rodríguez destaca “o gran esforzo” que está a realizar a Xunta “para incentivar a configuración do Porto Seco de Monforte como un polo de xeración de riqueza e emprego no sur de Lugo”. Rodríguez precisou que esta liña de actuación do Executivo autonómico estase a concretar en “incentivos á instalación de empresas e na dotación das conexións necesarias” na zona sur da provincia.

PRETO DE 20 MILLÓNS DE EUROS XA INVESTIDOS POLA XUNTA
Neste sentido, a deputada autonómica do Partido Popular e portavoz do Grupo Municipal do PP en Monforte lembrou que a Xunta leva realizado un investimento próximo aos 20 millóns de euros no desenvolvemento da plataforma loxística monfortina, así como na execución da súa conexión coa estrada LU-933, vial que entrou en funcionamento o ano pasado. Julia Rodríguez salientou tamén que, neste momento, está en fase de redacción o proxecto de construción para prolongar a LU-933 ata a N-120, co que estaría garantida unha “correcta accesibilidade” ao Porto Seco.•