• A Deputación aprobou en decembro novos investimentos por valor de 5,2 millóns de euros, para actuacións en 31 concellos, 7 dos cales están no sur de Lugo. O Incio, Chantada, Bóveda, Láncara, Ribas de Sil, Taboada e Pantón beneficiaranse destas obras, que servirán para mellorar traídas de auga, estradas e accesos a núcleos, así como obras en locais sociais, entre outras.

3,4 MILLÓNS PARA CONSTRUÍR A RESIDENCIA DE BECERREÁ, E 1 MILLÓN PARA ARRANXAR 8 ESTRADAS
Cómpre destacar que a partida máis notable corresponde á contratación das obras de construción da residencia pública de Becerreá, para a que o organismo provincial aprobou 3,4 millóns de euros.
Ademais, destinarase un millón de euros a traballos de acondicionamento dun total de 16 quilómetros de 8 viais. Estas actuacións están incluídas dentro do Plan de Mellora de Estradas Provinciais.

MEDIO MILLÓN PARA ARRANXAR ACCESOS A NÚCLEOS RURAIS
En canto á mellora de viais, a Deputación aprobou tamén 500.000 euros para acondicionar accesos a un total de 28 núcleos rurais. Entre os concellos beneficiados por esta medida, están Bóveda, Láncara, O Incio, Chantada e Ribas de Sil.

TRAÍDAS DE AUGA EN 9 CONCELLOS
O municipio de Ribas de Sil tamén está incluído no listado de concellos nos que a Deputación financiará melloras en traídas de auga. En concreto, o organismo provincial destina 125.000 euros para 9 actuacións noutros tantos municipios.

MELLORA EN INSTALACIÓNS DEPORTIVAS
Unha das partidas máis destacadas é a referida á mellora do campo de fútbol A Medela, en Taboada, traballos para os que a Deputación aporta 170.000 euros.

ACONDICIONAMENTO DE CINCO LOCAIS SOCIAIS NO RURAL
O financiamento provincial tamén servirá para acondicionar locais sociais de parroquias en cinco concellos, entre eles Pantón.
Por último, as partidas aprobadas pola Deputación de Lugo a finais de ano inclúen outros 30.000 euros para comprar maquinaria de reforzo do parque móbil de Negueira de Muñiz.•