• Os fondos do Museo Provincial de Lugo veñen de recibir tres novas pezas, trala doazón efectuada polo seu propio autor, o debuxante Siro López. O pasado día 12, o artista entregou á Deputación de Lugo os retratos en témpera realizados a tres ilustres persoeiros nacidos na provincia de Lugo.
A deputada de Cultura, Pilar García Porto, agradeceu a “implicación e xenerosidade” de Siro cos lucenses. “Para nós é unha honra e un orgullo que os museos da Rede Museística da Deputación poidan exhibir pezas dun dos mellores artistas galegos”, afirmou.
Os retratos asinados por Siro corresponden aos lucenses Paco Pestana, escultor nacido en Castroverde, Celestino Fernández de la Vega, natural de Friol e unha das figuras máis senlleiras do galeguismo, e Ramón Piñeiro, intelectual lancarao, referente da denominada “xeración Galaxia”.•
Cargando ...
