No último pleno provincial, o BNG conseguiu a aprobación dunha moción na que se esixe ao goberno estatal que axeite e incremente os investimentos nas infraestruturas e servizos ferroviarios da provincia de Lugo, co obxectivo de ofrecer unha alternativa de transporte realmente útil para a cidadanía.
RECLAMACIÓN DAS COMPETENCIAS FERROVIARIAS
A proposta, que recibiu o apoio do goberno provincial, marca como prioridades a electrificación das conexións Lugo-Ourense e Lugo-A Coruña, a remodelación da liña do antigo FEVE (Ferrol-Ribadeo) e o inicio dos estudos da variante Curtis-Ordes para unir Lugo con Compostela. Ademais, insta á Xunta de Galicia a reclamar as competencias ferroviarias para crear un ente público de xestión ferroviaria, recoñecidas no Estatuto de Autonomía.
«A cidade e a provincia de Lugo teñen que deixar de estar marxinadas en materia de infraestruturas ferroviarias. É preciso poñer a Lugo no mapa e comunicar á nosa veciñanza», afirmou a deputada Iria Castro, quen criticou a posición do Partido Popular por opoñerse á proposta e «botar balóns fóra», evitando as súas responsabilidades na xestión das competencias ferroviarias.
DESDOBRAMENTO DO CORREDOR NADELA-SARRIA-MONFORTE
Neste contexto, tamén se reprobou a falta de compromiso do PP coas infraestruturas galegas, tanto nos anos de goberno como na oposición en Madrid.
Ademais, no pleno provincial aprobouse por unanimidade unha moción para instar á Xunta de Galicia a executar a obra do desdobramento da totalidade do trazado do corredor Nadela-Sarria-Monforte, presentada polo PSdG. O vicepresidente da Deputación e deputado provincial Efrén Castro, reclamou ao goberno galego que concrete «uns prazos razoables para a execución das obras no corredor», que conta cun total de 54 quilómetros.•
Cargando ...
