Monforte de Lemos vén de entrar na directiva da Rede de Xuderías de España, e será responsable da Comisión de Turismo. A composición do equipo directivo decidiuse na 50ª Asamblea Xeral deste organismo, celebrada na localidade extremeña de Hervás o 15 de decembro.
O Concello anfitrión da Asamblea ostentará a presidencia da Rede, asistido por tres vicepresidencias, que corresponderon aos municipios de León, Estella-Lizarra e Lucena. A mesa da presidencia complétase con tres vogais, sendo o primeiro o Concello de Monforte, mentres que Plasencia e Segovia ocuparán, respectivamente, o segundo e terceiro cargo desta función.
ÁREAS DE TRABALLO
En canto ás Comisións de Traballo, a Asamblea acordou encargar ao Concello de Monforte de Lemos a Comisión de Turismo. Pola súa banda, Plasencia atenderá a de Educación, e Segovia a de Comunicación. •
