A Área de Cultura da Vicepresidencia da Deputación ten en marcha durante os meses de verán a mostra de autómatas Kinetiko, que inclúe diversas sesións en nove concellos da zona sur da provincia. A mostra, que fixo parada en Quiroga o 4 de agosto, está pensada para que o público poida manexar os mecanismos das distintas pezas e ver como funcionan.
As oito pezas únicas foron deseñadas e creadas polo titiriteiro Ero Vázquez, de Trécola, e o xogueteiro Manu Taboada, da Chintofanería, unidos no proxecto Xira Paus. A partir do movemento dunha manivela ou dun pedal, as figuras do pandereiteiro e da guitarrista cobran vida e fan soar os seus instrumentos, e as outras pezas recrean a súa propia historia, como un avó coidando a súa horta, un equilibrista ou unha nena que retira lixo do mar.
O calendario da mostra na zona sur inclúe en agosto unha sesión en Monforte o día 10, outra en Ribas de Sil o 16, e ao día seguinte en Triacastela, para continuar o 25 na Pobra do Brollón, e o 27 en Sarria. Xa en setembro, a mostra de autómatas chegará a Pantón o día 14 e a Bóveda o 15, para rematar cunha sesión en Chantada o 28 de setembro.•
Cargando ...
