O Concello de Sober vén de anunciar a reactivación do Programa de Animación á Lectura “Merenda con Contos” para nenos e nenas con idades comprendidas entre os 4 e os 12 anos. Este programa está deseñado para fomentar o amor pola lectura entre os máis pequenos e terá lugar dende o mes de outubro de 2023 ata xuño de 2024.
20 PRAZAS OFRECIDAS, CON PRIORIDADE PARA OS EMPADROADOS EN SOBER
As actividades do programa desenvolveranse na Biblioteca Pública Municipal de Sober e terán lugar todos os venres, das 16:30 ás 19:00 horas. Está prevista unha oferta de 20 prazas para os participantes, as cales serán asignadas por rigorosa orde de inscrición.
Terán prioridade os nenos e nenas empadroados no concello de Sober.
O prazo de inscrición para participar nesta enriquecedora experiencia literaria remata o 4 de outubro de 2023.
INSCRICIÓNS PRESENCIAIS E TELEMÁTICIAS
Os interesados en inscribirse poderán facelo de dúas formas: de xeito presencial, presentando a súa solicitude no Centro Sociocultural das 10:00 ás 12:00 horas, ou de maneira telemática, a través do rexistro telemático na sede electrónica do Concello, ou no rexistro de calquera administración pública adherida á plataforma de intercambio rexistral (SIR).
As actividades darán comezo o venres 6 de outubro de 2023, e o Concello de Sober convida a todos os nenos e nenas interesados a unirse a esta marabillosa aventura literaria no corazón da localidade. A través de “Merenda con Contos”, os participantes poderán descubrir o pracer da lectura nun ambiente divertido e enriquecedor.
Para obter máis información sobre este programa ou sobre o proceso de inscrición, pódese contactar co Concello de Sober nas súas oficinas ou visitar a súa sede electrónica.•
