No encontro definíronse as primeiras liñas de actuación que se irán materializando en traballos de investigación e definición conxunta das necesidades e obxectivos que darán lugar a un plan definitivo
Nun ambiente cargado de expectativas e compromiso, o Parador de Turismo de Monforte de Lemos foi o escenario do paso máis recente na concreción do Plan Director da Agrupación de Interese Económico Ribeira Sacra Next. O acto, celebrado este xoves 25 de abril, marcou un hito significativo no camiño cara ao desenvolvemento e fortalecemento do tecido empresarial e social da nosa comarca. A sinatura do contrato de asesoramento e asistencia técnica para a elaboración deste plan é o resultado dunha laboriosa xornada de colaboración e debate. Hace agora un mes, a Agrupación Empresarial da Ribeira Sacra convocaba un encontro para recoller propostas de cara á elaboración deste documento crucial. Universidades, empresas e institucións uníronse nun esforzo colectivo para definir as necesidades e obxectivos dos diferentes sectores empresariais da nosa contorna.
A partir das propostas presentadas polas Universidades da Coruña e Vigo-Ourense, un debate construtivo permitiu tomar a decisión de desenvolver o Plan Director. Este acordo non só representa un compromiso co progreso e a innovación, senón tamén un exemplo do poder da colaboración entre o sector privado e as institucións académicas. A importancia deste paso foi subliñada por figuras destacadas presentes no evento, como o Reitor da Universidade da Coruña, Ricardo Cao Abad, quen expresou o seu orgullo por participar nun proxecto que une esforzos en prol dun obxectivo común. Manuel Dacosta Ribera, Presidente da Agrupación Empresarial da Ribeira Sacra, destacou a relevancia da unión de todos os axentes implicados e fixo fincapé nos catro pilares fundamentais que sustentarán o Plan Director: o tecido empresarial, o territorio, a fixación de poboación e o papel da muller no emprendemento e na vida da contorna. Nesta xornada de sinatura, o grupo de traballo encargado de coordinar o plan, reuniuse coa Universidade da Coruña para perfilar as liñas xerais do documento. Este grupo, composto por líderes empresariais, profesionais do sector turístico e agrario, entre outros, ten como obxectivo garantir unha visión integral e inclusiva no proceso de elaboración do Plan Director.
O compromiso co impulso do territorio e a promoción do relevo xeracional quedou patente neste encontro, onde se fixaron as primeiras liñas de actuación que guiarán o proceso de investigación e definición dos obxectivos. A través dun traballo colaborativo e interdisciplinario, a nosa comarca avanza na consolidación dun futuro próspero e sustentable.•
Cargando ...
