Varela Rodríguez, durante a visita a Oficina móbil para emigrantes retornados . Foto GPXG.
O presidente da Xunta, Alfonso Rueda, subliñou o luns día 22 de xaneiro, a importancia da Oficina móbil de atención a emigrantes retornados, destacando o seu papel en achegar información e asesoramento sobre o retorno a calquera punto da comunidade galega. Durante a súa visita á oficina móbil no concello de Chantada, Rueda salientou que «retornar é un dereito, pero somos conscientes de que non é fácil e que se precisa apoio despois de tomar esta decisión valente para poder integrarse e sentirse a gusto desde o primeiro día na que sempre foi a súa terra».
NINGÚN RETORNADO SEN APOIO POR DIFICULTADES DE DESPRAZAMENTO
O obxectivo principal desta iniciativa é garantir que ningún retornado quede sen apoio por ter dificultades para desprazarse ata as cidades. A Oficina móbil percorre o rural galego para resolver dúbidas sobre trámites, cuestións tributarias, sistema educativo, vivenda e para ofrecer asesoramento e orientación laboral personalizada. Este servizo complementa o ofrecido polas sedes físicas da oficina en Santiago, A Coruña, Vigo, Lugo e Ourense.
Rueda destacou que favorecer o retorno é clave para o futuro de Galicia, sinalando que máis aló do dereito dos galegos no exterior a regresar, este colectivo xoga un papel fundamental no afrontamento do reto demográfico e na construción dunha comunidade máis competitiva. O presidente da Xunta, Alfonso Rueda instou a recordar que «moitos dos antepasados dos que agora retornan» son aqueles que en seu día tiveron que emigrar, pero que nunca deixaron de sentirse galegos, contribuíndo á construción da «Galicia das oportunidades» que temos hoxe.
O servizo ofrecido pola Oficina Móbil non só alivia o proceso de retorno, senón que tamén fortalece os lazos entre Galicia e a súa diáspora, contribuíndo ao crecemento e á diversidade da comunidade.•
