Xa se pode descargar o Bono Activa Comercio, unha iniciativa da Xunta para impulsar o consumo local

A Xunta de Galicia pon en marcha a partir de hoxe a quinta edición do Bono Activa Comercio, unha iniciativa que conta cunha dotación de 2,5 millóns de euros co obxectivo de dinamizar o sector comercial e fomentar as vendas nos establecementos de proximidade. A través desta medida, estímase mobilizar uns 12 millóns de euros en compras nos comercios galegos. Os establecementos interesados en participar nesta iniciativa están a adherirse dende o pasado 16 de abril, e teñen de prazo ata o 1 de setembro para facelo. Polo seu lado, as persoas consumidoras poderán acceder aos bonos desconto, de ata 30 euros, a través da web www.bonosactivacomercio.gal.
Estes bonos, que terán formato dixital QR, estarán dispoñibles nunha aplicación móbil para a súa fácil utilización. O desconto aplicarase en función do valor da compra, sendo de 5 euros para compras entre 20 e 30 euros, de 10 euros para compras entre 30 e 50 euros, e de 15 euros para compras superiores a esa cantidade. Cada persoa poderá descargar un único bono, e non haberá un límite de usuarios que poden facelo. Non obstante, unha vez que o importe total dos descontos alcanza os 2,5 millóns de euros, os bonos descargados deixarán de estar dispoñibles para ser utilizados.
O cliente amosará no esteblecemento colaborador o seu código QR que terá na súa aplicación movil. Posteriormente, o comercio accede á app TPV e teclea o importe da compra. A aplicación do Bono Activa Comercio valida e calcula o prezo final, o que tamén fará o propio comercio, para que a plataforma rexistre e desconte o bono e proceda a actualizar o Wallet do cliente. Finalmente, a entidade financieira efectúa o pago da cantidade descontada ao comercio.
Esta iniciativa da Xunta, en colaboración coa Federación Galega de Comercio e as Asociacións Provinciais, forma parte do paquete de medidas específicas para o sector que o Goberno galego está a poñer en marcha para acompañar ao comercio de proximidade na súa reactivación, impulsando a súa competitividade a través de iniciativas que permitan a súa modernización e incentiven o consumo.•