Foto Mateo L. Veiga.
O Concello de Pantón agarda con entusiasmo os días 11 e 12 de maio para celebrar a XXIX edición da Mostra de Viños da Ribeira Sacra de Pantón, un evento que, ao longo dos anos, se converteu nun referente gastronómico e cultural da zona. Este evento, declarado Festa de Interese Turístico de Galicia, é unha oportunidade única para degustar os mellores viños da comarca nun ambiente festivo e acolledor.
A presentación desta edición tivo lugar o pasado venres coa participación do alcalde de Pantón, José Luis Álvarez, xunto cos concelleiros Cristina Domínguez e Manuel López. Foi o Alcalde José Luís Álvarez, o que quixo destacar a importancia desta festa para promocionar o municipio e os seus viños, sendo ademais un dos principais atractivos na axenda festiva de Pantón. “Somos o único concello da Ribeira Sacra con tres ribeiras, iso xa é especial”, sinalou o alcalde, animando a todos a participar nesta celebración.
Cristina Domínguez aseguraba, “Mantemos o encanto dunha feira tradicional e pequena, con carácter cercano para veciños e visitantes que nos acompañan. Para o pregón contamos cunha persoa que é veciña e coñecida. Para nós é unha honra que Alexandra Seara sexa a pregoeira desta edición porque é moi querida por todos e porque queriamos que este ano pregoase unha muller e non calquera muller”.
Como prólogo á Mostra, o xoves, 9 de maio, ás 20:30h, haberá unha cata de viños comentada na adega do Pazo de Ferreiroá, onde o enólogo Alfonso Losada Quiroga guiará aos asistentes nun percorrido sensorial a través dos mellores viños da zona.
Este ano, a mostra contará con 10 adegas participantes, Alma das Donas, Casa Moreiras, Finca Míllara, Ciudaseis, Nogueiras, Capilla, Saíñas, Don Ventura, Corzoás e Fento Wines. A apertura das casetas farase ás 12:00h do sábado e media hora despois entregaranse os premios do IX Concurso Fotográfico Red Ribeira Sacra-Viticultura Heroica. A programación oficial domezará o sábado, día 11 de maio, coa inauguración oficial ás 13:00h a cargo de D. Antonio Acevedo Prado, Director Xeral de Maiores e Atención Sociosanitaria, seguida dun brinde simultáneo co Día Movemento Viño D.O. e a VII Festa da Empanada. A música en directo, a cargo da Orquestras Gran Parada, amenizará a festa ata altas horas da noite.
O domingo, día 12 de maio, a celebración continuará co pregón da Mostra, a cargo de Alexandra Seara Sobrino, Xerente do Consorcio de Turismo da Ribeira Sacra, seguido de música en directo, actuacións culturais e moita diversión para todas as idades. Pantón agarda a chegada de veciños e visitantes para disfrutar dunha festa onde a tradición, a gastronomía e o viño se fusionan nun ambiente de alegría e convivencia. Despois desta Festa de Interese Turístico de Galicia, Pantón acollerá unha nova edición de Rota do Románico. •
