Sarria implica aos novos narradores e aos poetas galegos a través de dous premios xa consolidados neste eido
Redacción – Sarria
As terras de Sarria miran cara a literatura dun xeito especial tentando fomentar esta arte entre diversos sectores e dende a base social. O poeta sarriano Fiz Vergara e o destacado escultor relixioso do século XVII Gregorio Fernández dan nome a dous certames que converten ano a ano a Sarria en centro de atención para o mundo da literatura. Promovidos dende a asociación cultural Ergueitos e e dende o Instituro de Educación Secundaria Gregorio Fernández respectivamente, estes certames moven a conciencia creativa no eido galego e comarcal. Poesía e narrativa son protagonistas en cada un dos casos.
PROMOCIÓN DAS LETRAS E DA CULTURA DA MAN DAS ASOCIACIÓNS
O pasado mes de maio Xerardo Quintiá recollía o Fiz Vergara Vilariño destacando o certame como unha importante plataforma de lanzamento que á vez fai posible a publicación da dunha obra que quizáis non se vise nunca editada para o público se non fose por oportunidades coma esta. Este tipo de premios son, segundo recoñecía o autor galardoado, “un pouco os mecenas de hoxe en día”. O prestixio do premio Fiz Vergara vese avaliado polo seu recoñecemento entre os literatos galegos e fai que este ano se cumprise nada menos ca unha década de existencia. O Premio de poesía Fiz Vergara Vilariño nace no ano 2000 a iniciativa da Asociación Cultural Ergueitos, co patrocinio do Concello de Sarria e como homenaxe ao poeta de Lóuzara Fiz Vergara Vilariño. Pero a actividade de Ergueitos en prol da literatura nunca estivo centrada unicamente na organización do nomeado premio, senón que se proxecta como algo constante e permanente, sempre dentro das posibilidades económicas do colectivo. A súa presidenta, María Casar, destacaba recentemente para este periódico, a importancia que teñen acadado outras actividades coma o Roteiro Artístico Literario de Lóuzara que tivo lugar este sábado 11 de xuño repetindo o percorrido polas terras de Fiz Vergara. Esta rota é un compendio da obra de trece artístas plásticos en trece lugares da Xabreira e acompañados de trece poemas do autor local. A loita por facer da figura de Fiz Vergara un referente fixo tamén do val da Lóuzara un museo ao aire libre no que pervive a súa memoria,en gran parte grazas a unha cultura asociacionista intimamente ligada ao carácter do municipio sarriano. O roteiro repítese cada ano con mellor resposta veciñal e completouse cunha visita á casa do Fiz, o muíño e a Fonte da Cova e un recital poético-musical na Aira de Tesín. O punto e final púxose na Fervenza de Augadalte e o Pozo de Beltrán.
O TALENTO DOS MÁIS NOVOS, SEMENTE DO PREMIO DE NARRATIVA IES GREGORIO FERNÁNDEZ
Pero o fomento da creación literaria na comarca tivo precisamente nos últimos días outro dos seus mellores momentos coa entrega do premio IES Gregorio Fernández a varios alumnos de centros educativos da zona. No canto da poesía, a narrativa é aquí a protagonista, e o instituto leva nada menos que oito anos coa convocatoria dun premio destinado a todos os alumnos da comarca de Sarria que cursan estudos de primaria, secundaria, bacharelato e ciclos formativos. Foron un total de 12 os premiados, e as súas obras veranse recollidas nun libro que se edita anualmente vinculado a este certame. Pero a creatividade literaria vai aquí parella á ilustrativa, polo que tamén se conceden recoñecementos nesta disciplina.
A alta participación e a implicación dos rapaces conforma o principal motivo que move ao instituto a traballar durante todo o ano polo certame, buscando unha colaboración que atopan nos concellos da comarca, entidades como Novacaixagalicia, a Deputación e a Xunta, que poñen o seu gran de área para facer posibles tanto os premios como a publicación do libro. O certame xurde dunha idea dos profesores do centro educativo co fin de fomentar a escrita entre o público máis novo e implicar a toda a comarca tendo unha referencia en Sarria. A resposta foi contundente, e este ano recibíronse arredor dun cento de traballos onde cadaquén aportou a súa narración. Para Luis López Melle, secretario do Gregorio Fernández “ trátase dunha iniciativa realmente interesante, que dá boa conta da canteira coa que se conta na zona pensando no futuro da literatura galega. O certame conta con participantes que teñen obtido numerosos recoñecementos como é o caso de Elena López González, unha moza con obras prometedoras no eido da narrativa. A delegada territorial da Xunta estivo presente, entre outras autoridades, no acto de entrega celebrado este ano en Triacastela; Raquel Arias, animou aos alumnos da comarca a “aspirar a ser os futuros creadores da cultura galega”.
Nunca é suficiente o que se fai polo fomento da cultura, da literatura e da lectura nun contexto no que Internet está a desprazar moitas das boas costumes, fundamentalmente entre os máis novos. E esta é unha idea que non se lle escapa nin a Luis López nin aos profesores dos departamentos de Linguas e Orientación que enfocan esta iniciativa co afán de espertar inquedanzas polo mundo da literatura. Alumnado do colexio da Bretaña francesa co que o instituto mantén un intercambio unido ao irmandamento que Sarria ten dende hai anos con Guerledan, son tamén participes deste certame, achegando unha pequena dose de cosmopolitismo á narrativa local, e facéndoa, se cabe, máis universal.
Premiados narrativa IES Gregorio Fernández 2011
Primaria 2º ciclo: Tamara Corral, Laura López ( CEIP Triacastela), Odei Duarte (ilustración, O Incio).
Primaira 3º ciclo: Cid rey, Lucía Capón, Christian Expósito (CEIP Frei Luis de Granada), Natalia Moure (ilustración Frei Luis de Granada)
ESO 1º ciclo: Alba Vázquez, Julia Castellanos ( Colexio Asunción).
ESO 2º ciclo: Elena López (colexio Asunción), Noelia Rodríguez e Iago Quiroga (Ies Gregorio Fernández)
BAC e Ciclos formativos: Andrea García (IES Gregorio Fernández), Maël le Gaillard (categoría de obra en francés por intercambio co colexio bretón Paul Eluard.
