O ano 2014 arrinca na nosa provincia cun repunte do paro no último mes do ano saínte, e cun declive das cifras poboacionais que parece ser unha constante dende o 2011. Con estes datos contextuais, a Deputación de Lugo ven de presentar a súa folla de ruta para o ano que comeza, e na que os piares fundamentais de actuación están centrados, precisamente, en combatir estas dúas ameazas para o futuro da nosa provincia.
O ANO 2013 REMATOU CON 5.867 PERSOAS EN SITUACIÓN DE DESEMPREGO NO SUR DE LUGO
As cifras do paro ensombreceron o final de ano, que rematou con 27.615 parados en toda a provincia, que no sur de Lugo se traduciron en 5.867 desempregados. Por comarcas, Terra de Lemos rexistrou 2.630 persoas en paro, o que supón un incremento do 0,76% respecto ó mes anterior. A comarca de Sarria contaba en decembro con 1.826 parados, o que implica un repunte do paro nun 2,87% dende novembro. Na comarca de Chantada, os desempregados rexistrados nas oficinas do Servizo Galego de Colocación foron 957 en decembro, única comarca na que o paro descendeu, neste caso un 1,2% respecto a novembro. A comarca de Quiroga foi a de maior subida procentual do desemprego, con 454 parados en decembro, o que supón un aumento do 7,07% dende o mes anterior. Neste sentido, dende o sindicato UGT-Lemos Valdeorras denunciaron “o drama” que están a vivir as familias dos 2.400 parados que nas comarcas de Lemos, Chantada e Quiroga xa non cobran ningún tipo de prestación. A nivel provincial, o voceiro socialista na Deputación de Lugo, Manuel Martínez, denunciou “a discriminación da Xunta con Lugo”, a provincia de Galicia onde máis aumentou o paro en termos relativos no mes de decembro, rexistrando un repunte dun 0,64%, o que supón 175 novos desempregados. «Dende que Feijóo está na Xunta, Lugo conta con 7.744 desempregados máis», criticou Martínez, quen manifestou o compromiso da Deputación de Lugo de «ser máis perseverantes aínda» na aposta pola creación de emprego, «a nosa máxima prioridade».
As becas Leonardo da Vinci contarán nesta edición con 70 bolsas para que mozos e mozas lucenses poidan mellorar a súa empregabilidade adquirindo formación e experiencia en empresas europeas. A formación nos sectores agropecuario e forestal e a creación de empresas vinculadas será o obxectivo doutro programa, destinado a 900 lucenses.(Foto: Arquivo EC).
CONTINUIDADE DOS PROGRAMAS PARA XERAR EMPREGO
Con esta finalidade, o organismo provincial vai destinar este ano 13 millóns de euros para a creación de emprego, dos que 3,5 millóns corresponden ó II Pacto polo Emprego, cofinanciado nun 80% pola Unión Europea e que xa comeza este mes, co que se beneficiará a 1.000 lucenses desempregados con formación en profesións de futuro e práticas remuneradas. Este ano tamén porase en marcha o plan da Escola de Organización Industrial, dotado con 3 millóns de euros, que dará emprego a preto de 100 persoas para convertelos en especialistas en innovación para poder asesorar a 300 pemes e autónomos lucenses. Ademais, a Deputación de Lugo segue a apoiar ós Concellos, xa que este ano vai impulsar outro plan de emprego para todos os municipios, ó que destinará 5 millóns de euros, e dará continuidade ó plan específico para Concellos de menos de 5.000 habitantes, que poderán contratar a 80 desempregados. No eido formativo, a mocidade lucenses poderá beneficiarse, un ano máis, das 70 bolsas Leonardo da Vinci para mellorar a súa formación e experiencia en empresas europeas, e, por outra banda, 900 lucenses recibirán formación nos sectores agropecuario e forestal para a creación e renovación de empresas. Según precisou Manuel Martínez, todas estas actuacións do organismo provincial supoñen un 90% máis de investimento en emprego «fronte o recorte en 238 millóns de euros da Xunta dende a chegada de Feijóo, que fixo que Galicia fora unha das tres únicas Comunidades de España nas que aumentou o paro en decembro».
O SUR DE LUGO PERDEU NUN ANO 1.077 HABITANTES
A sangría demográfica da zona sur de Lugo amosa unhas cifras incuestionables: todos os concellos do sur lucense perderon poboación durante o último ano rexistrado. Según os datos do Instituto Nacional de Estadística, no conxunto das comarcas de Terra de Lemos, Sarria, Chantada e Quiroga perdéronse 1.077 habitantes entre xaneiro de 2012 e xaneiro de 2013. Os datos do padrón municipal nestas datas falaban de 77.332 habitantes a comezos do 2012 para as catro comarcas do sur, que se quedaban en 76.255 habitantes a 1 de xaneiro de 2013. Por comarcas, a maior sangría localízase na Terra de Lemos, que mingua en 480 habitantes (32.333 habitantes no último padrón). A comarca sarriana baixou en 256, quedando en 23.917 habitantes. Pola súa banda, a comarca chantadina diminuiu en 249 persoas empadroadas, con 14.287 habitantes. A comarca quiroguesa descendeu en 92 persoas, cun cifra final de 5.721 habitantes. Por concellos, a baixada máis destacada protagonízase en Monforte, que perdeu no último ano rexistrado 178 habitantes, quedando en 19.426 a xaneiro de 2013. Chantada perdeu 134, cunha cifra final de 8.649 habitantes. A terceira baixada importante sitúase en O Saviñao, cunha perda de 112 habitantes, que fai descender a súa poboación ata os 4.202. Outros descensos destacados nos números poboacionais son os de Pantón, que queda en 2.772 habitantes tras perder 88, ou Carballedo, con 2.465 habitantes definitivos e unha baixada de 70 persoas rexistradas. A Pobra do Brollón mingua en 74 habitantes, ata quedar nos 1.897, e Samos perde 54, quedando en 1.502 habitantes. Sarria destaca pola súa escasa baixada, con 36 habitantes menos no último ano rexistrado, e cunha cifra poboacional de 13.488. A capital da comarca quiroguesa perde 43 habitantes, co que o municipio de Quiroga queda con 3.552 habitantes. Pola súa banda, Sober foi o municipio co descenso máis reducido, ó perder 9 habitantes, cun cómputo final de 2.469 habitantes.
Dende o organismo provincial destacan a importancia destas instalacións tanto para a atención ós nosos maiores, que disporán de 300 novas prazas residencias e de atención diurna e non terán que deixar o seu municipio, como para a creación de emprego nun dos sectores con máis empregabilidade hoxendía. A posta en marcha destes centros creará 140 postos de traballo directos, según estiman dende o organismo provincial, o que contribuirá á dinamización da economía local, e servirá de freo para o despoboamento demográfico.(Foto: Arquivo EC).
RESIDENCIAS E CENTROS DE DÍA PARA CREAR EMPREGO, BENESTAR E FREAR A SANGRÍA DEMOGRÁFICA
Diante desta situación, dende a Deputación de Lugo concretaron como segundo gran desafío para 2014 combatir esta sangría demográfica, con medidas que potencien o benestar social. Neste sentido, o organismo provincial anunciou que este ano rematará as obras das residencias e centros de día públicos de A Fonsagrada, Castroverde, Trabada, Pedrafita do Cebreiro e Pol, e iniciará as de Navia de Suarna e Ribas do Sil. Según os responsables provinciais, a posta en marcha destas unidades de atención social suporán a creación de 140 empregos directos, e de 300 prazas residencias e diurnas para os nosos maiores, o que repercutirá non só na dinamización da economía local, senón tamén no benestar dos maiores, que non terán que abandoar o seu municipio ó contar con instalacións sociais preto dos seus fogares.
O obxectivo desta medida busca «avanzar no proceso de modernización, transparencia e racionalidade da Deputación de Lugo, iniciado hai seis anos», según precisan dende o organismo provincial. (Foto: Arquivo EC).
PULO Ó SECTOR PRIMARIO, Á EDUCACIÓN DE CALIDADE E Á PARTICIPACIÓN CIDADÁ
Dentro da folla de ruta da Deputación de Lugo para este está incluída a aposta polo sector primario como un dos eixos da reactivación económica da nosa provincia. Manuel Martínez explicou que o organismo provincial porá en marcha nestes meses as derradeiras obras do primeiro centro público en España de recría de gando vacún, dando emprego en Lugo a 200 persoas. Con esta iniciativa, o organismo provincial pretende crear 3.000 novas prazas, duplicando a capacidade de recría existente en Galicia, co que tamén se aforran cartos ós gandeiros e se dinamiza a economía provincial, cun volume de negocio estimado de 3 millóns de euros para un total de 1.500 reses ó ano. En canto á educación, a aposta deste ano da Deputación lucense materializarase co remate das instalacións da nova sede da UNED en Lugo, que situará na capital provincial o centro referencial da UNED no noroeste de España, «destacando entre as restantes sedes de Galicia, Asturias e Castela León», explicou o voceiro provincial socialista. Dentro da folla de ruta da Deputación de Lugo está incluída unha medida novedosa, sen precedentes nos organismos provinciais de España. A Deputación lucense vai comezar cos encontros con colectivos da nosa provincia para elaborar durante este ano os primeiros Orzamentos participativos dunha Deputación en España. O obxectivo desta medida, según precisou Manuel Martínez, voceiro provincial socialista, é «avanzar no proceso de modernización, transparencia e racionalidade desta institución, iniciado hai seis anos».
MEDIDAS DE APOIO E COOPERACIÓN COS CONCELLOS
Durante o 2014, a Deputación de Lugo manterá a “máxima cooperación” cos Concellos lucenses en diversos aspectos. Por unha banda, o organismo provincial seguirá a ofrecer de xeito gratuíto asistencia xurídica, urbanística, económica e de recursos humanos, entre outras áreas, ás entidades locais. Asimesmo, proseguirá co fomento do goberno aberto coa aposta pola administración electrónica. En canto ás infraestraturas a nivel municipal ou que afecten a pequenos grupos de poboación, o organismo provincial destinará este ano unha dotación de 7,5 millóns de euros ó Plan de Obras e Servizos, ou ó plan de infraestruturas de interés veciñal, entre outros. No eido económico, a Deputación de Lugo seguirá axudando ós municipios a gañar liquidez co Sistema de Recadación Provincial, e continuará a impulsar diversos programas para favorecer o aforro de gastos corrientes ás arcas municipais, en partidas tan importantes como a factura da luz, un aspecto no que os Concellos levan xa tempo concentrando a súa atención, polo volume do gasto que supón en cifras anuais para as fráxiles economías locais e que este ano, diante do anuncio, por parte do Goberno central, da suba do prezo da electricidade, dificultará aínda máis a posibilidade de que os Concellos cadren as contas nesta partida.
A administración electrónica tamén será obxecto de constante atención dende o ente provincial, así como a mellora das prestacións públicas.
En canto a infraestruturas a nivel municipal, a Deputación vai destinar 7,5 millóns de euros en plans como o de infraestruturas de interés veciñal ou o de Obras e Servizos, así como as diversas actuacións para extender o servizo de banda longa.(Foto cedida).
A FACTURA DA LUZ, O GRAN CREBACABEZAS DOS PEQUENOS CONCELLOS
As cifras do gasto eléctrico nos concellos do sur de Lugo son variables según a extensión territorial e a dispersión poboacional de cada municipio. Mentres que Bóveda rexistra un gasto de entre 55.000 e 60.000 euros anuais en electricidade, Ribas do Sil amosa un gasto en torno ós 43.000 euros. Para tratar de reducir estes números, en Bóveda optaron pola substitución de 200 luminarias o pasado ano, cunha subvención do Inega. Con este mesmo fin, en Ribas do Sil tomaron a “difícil e moi meditada” decisión, en palabras do tenente de alcalde, Roberto Castro, de levar a cabo un apagado selectivo do alumeado público, medida que foi todo un éxito ó conseguir reducir o importe da factura da luz en case 1.000 euros ó mes durante 2012. Ademais desta medida, en Ribas de Sil puxeron en marcha o ano pasado un completo programa de accións, destinado á substitución de luminarias por outras máis eficientes, a instalación de paneis fotovoltaicos e a posta en marcha dun novo tanque para o suministro de auga que reduce notablemente o consumo eléctrico do bombeo. Tamén optaron pola eficiencia no alumeado público en Monforte de Lemos, onde o Concello ten un gasto anual en electricidade en torno ós 480.000 euros. Gracias ó apagado selectivo de luminarias públicas e a substitución de lámpadas por outras de menor potencia lumínica, o Concello de Monforte conseguiu un aforro de 58.000 euros nos primeiros nove meses do ano pasado. As medidas de aforro tamén están a ser aplicadas en Sober, concello que ronda os 200.000 euros de gasto anual en electricidade polos seus 4.000 puntos de luz, o bombeo do suministro da auga, o consumo nos edificios públicos e os máis de 200 suministros situados en parroquias. Precisamente neste mes completouse a renovación integral do alumeado público en 13 lugares do rural de Sober, onde se realizou a unificación de alumeados dando de baixa oito cadros, e se instalaron luminarias de aloxenuro, que supoñen “un moi importante aforro e mellor luminosidade”, según explicou o alcalde de Sober, Luis Fernández Guitián. Dada a necesidade dos Concellos de baixar os gastos correntes en luz, a revisión das facturas foi unha labor constante no control do gasto nos municipios. Os importantes e frecuentes erros na facturación da luz por parte das compañías subministradoras xa foran denunciado pola Federación Galega de Municipios e Provincias (Fegamp) a comezos do ano pasado, erros que xeran “problemas de tesourería” nos Concellos, según explicaba no seu día Alfonso Villares, vicepresidente executivo da Fegamp. De aí que a revisión das facturas da luz continúe a ser este ano un dos servizos que a Axencia Provincial de Enerxía da Deputación de Lugo ofrece ós municipios que de xeito voluntario se adheriron, o pasado ano, ó Plan de Aforro enerxético do organismo provincial, e que abría a posibilidade de reducir o gasto anual en luz nun 20%. Xunto ás auditorías eléctricas realizadas en 37 concellos, este Plan aportou material eficiente a 13 municipios, que xa aforran 160.000 euros en luz cada ano. A importancia destas medidas foi destacada polo deputado de Cooperación e Asistencia ós Concellos, Álvaro Santos Ramos, trala recente suba da luz “imposta polo Goberno central”, e que suporá un incremento do gasto en electricidade de 4.600 euros anuais por Concello, que no total da provincia ascenderá a 308.000 euros ó ano.
Por outra banda, o organismo provincial está a completar unha Guía Verde, que será presentada nas próximas semanas, destinada a particulares, empresarios e entidades, con consellos para acadar o máximo aforro enerxético e eficiencia na contratación da luz.. (Foto: Arquivo EC).
GUÍA VERDE DO AFORRO ELÉCTRICO PARA PARTICULARES E EMPRESAS
Xa que a suba do prezo da luz afectará tamén ós 135.891 fogares da provincia de Lugo, Santos Ramos anunciou medidas provinciais para paliar esta “noticia terrible para a economía familiar, porque este aumento suporá que os lucenses paguen ó ano 89 millóns de euros pola luz, que son 2 millóns máis que o ano pasado”. Esta cifra podería chegar a ser de 10 millóns de euros máis no caso de que a luz suba un 11,5%, “como tiña previsto o Goberno central”. Neste sentido, Santos Ramos anunciou que a Deputación vai presentar en breve unha Guía Verde para veciños, empresas e entidades, na que explica como aforrar na facturación eléctrica con consellos e asesoramento técnico.•
