•O pasado día 6, unha educadora ambiental de ADEGA visitou Monforte para facer seguemento de dous proxectos de compostaxe doméstica, que desenvolven dende o mes de marzo veciños das parroquias de Rioseco e A Pinguela. No primeiro caso, a educadora verificou o estado dos composteiros individuais que teñen as dez vivendas que participan neste proxecto de compostaxe. No caso de A Pinguela, tratouse da comprobación do proceso que se realiza no composteiro comunitario. Nesta terceira visita, os veciños tiveron a ocasión de plantear á educadora todas as dúbidas xurdidas durante o proceso de compostaxe.
Según lembraron dende o Concello de Monforte, o proxecto de compostaxe doméstica busca reducir e prever a xeración de residuos, xa que a fracción orgánica procedente dos restos de alimentos dos fogares supón case a metade do contido da bolsa de lixo. Deste xeito, redúcese o volume de residuos que hai que tratar, e obtense un produto aproveitable para a fertilización da terra e dos cultivos domésticos.•
