• O venres 29 terá lugar en Palas de Rei a xuntanza de alcaldes dos municipios polos que pasan os Camiños Francés e Primitivo, na que será a primeira reunión informativa sobre as axudas á rehabilitación do programa Vivendas no Camiño.
A conselleira de Infraestruturas e Vivenda, Ethel Vázquez, acompañada do director do Instituto Galego da Vivenda e o Solo, Heriberto García, achegarán os detalles destas subvencións, así como os procedementos de solicitude, aos alcaldes dos concellos destas rutas, entre os que están Sarria, Triacastela, Samos e Paradela.
3,2 MILLÓNS DE EUROS PARA REHABILITAR VIVENDAS NOS CONCELLOS DOS CAMIÑOS FRANCÉS E PRIMITIVO
O programa Vivendas no Camiño conta neste ano cun orzamento nas Contas da Xunta dun total de 3,2 millóns de euros, para actuacións de rehabilitación de edificios e vivendas situadas na área de rehabilitación integral dos Camiños de Santiago.
A Xunta considera este programa como «un novo impulso na posta en valor destas vilas e cidades galegas, que se atopan nesta contorna privilexiada», ao tempo que contribúe a xerar emprego, fixar poboación e mellora a calidade de vida da veciñanza.•
