• O sábado 14 de maio, o pavillón polideportivo municipal de A Pinguela en Monforte acollerá o Campionato Galego de Voleibol na categoría cadete feminino.
O CV Ribeira Sacra, anfitrión da proba autonómica, iniciará o calendario da competición, enfrontándose ao Jealsa Boiro Voleibol ás 10,00 horas. A segunda semifinal disputarase ás 12 horas, entre o Mocavi Xuvenil Teis e o CV Liceo. O equipo gañador sairá da final que se xogará pola tarde, e a entrega dos trofeos está prevista para as 21 horas.
LUNA, PRESIDENTE DA FEDERACIÓN GALEGA:»CO CV RIBEIRA SACRA, MONFORTE VOLVE SER UNHA PRAZA FORTE DO VOLEIBOL GALEGO»
Na presentación do Campionato Galego de Voleibol cadete feminino, o alcalde de Monforte, José Tomé, felicitou ao CV Ribeira Sacra por ter acadado a clasificación para esta proba, «o que deixa claro o seu nivel deportivo, demostrado en todas as competicións nas que participan». Así mesmo, Tomé agradeceu á organización da proba autonómica por contar con Monforte, xa que «vai contribuír a xerar un ambiente deportivo importante» na cidade.
Pola súa banda, o presidente da Federación Galega de Voleibol, José Antonio Luna, lembrou que «Monforte é un núcleo histórico do volei en Galicia», xa que ao longo de moitos anos tivo equipos de élite, e da súa base saíron grandes xogadoras a nivel nacional. Luna manifestou a súa satisfacción porque «Monforte volva ser unha praza forte do voleibol galego».
O adestrador do CV Ribeira Sacra, Manolo Martínez, destacou que o Campionato Galego «será moi igualado, xa que hai moi bos equipos». Martínez suliñou que a cita de Monforte vai reunir «un moi bo nivel de voleibol, xa que a selección galega foi terceira no Campionato de España».•
Cargando ...
