•A Área de Cultura da Deputación financia este programa con 35.000 euros •As actividades poden ser solicitadas por asociacións ou Concellos

O deputado responsable da Área de Cultura da Deputación, Xosé Ferreiro, e Esther López, responsable técnica do programa, na presentación de “Artesanía en curso”. GPVDL

• A Área de Cultura da Deputación de Lugo puxo en marcha a comezos deste mes unha nova programación de actividades por toda a provincia. Trátase do programa “Artesanía en curso”, que ten como obxectivo levar a artesanía a todas as comarcas lucenses.
Según explicou o deputado responsable da Área de Cultura, o nacionalista Xosé Ferreiro, este programa destaca pola “democratización e transparencia que supón”, xa que “son actividades abertas ao público en xeral, que poden solicitar asociacións e Concellos”. Ferreiro suliñou que este programa “segue a liña de traballo que mantemos na Área de Cultura, realizando unha programación cultural de abaixo cara arriba, sendo as propias asociacións e Concellos quen deseñan as accións a levar a cabo”.

OBRADOIROS E DEMOSTRACIÓNS
Según explicou a responsable técnica desta iniciativa, Esther López, o programa “Artesanía en curso” inclúe diversas tipoloxías de cursos e obradoiros: monicreques, coiro, tear alto lizo, macramé, xoiería en arxila polimérica, cestería, cestería de reciclaxe, ‘scrapbooking’, tapizaría, carpintaría, talla, ebanistería, traxe tradicional, encadernación, confección e patronaxe, olaría, tear, ou fotografía, entre outros. Ademais, o programa integra a posibilidade de realizar demostracións nas especialidades de coiro, olaría, cestería, cantaría, forxa, e talla de madeira, entre outras.
O programa “Artesanía en curso” desenvólvese a través do Centro de Artesanía e Deseño (CENTRAD), e conta cun financiamento total de 35.000 euros, aportados pola Área de Cultura da Deputación de Lugo.

DISTINTOS PRAZOS DE SOLICITUDE
As solicitudes poden realizarse dende o día 2 de xuño, data de publicación das bases do programa no Boletín Oficial da Provincia (BOP). O prazo de solicitude para os cursos e obradoiros é de 20 días hábiles, a contar desde o día seguinte á publicación das bases no BOP.
En canto ás demostracións, poderán inserirse en feiras e outro tipo de eventos, e poderán solicitarse durante o período comprendido entre o día seguinte á publicación das bases no Boletín Oficial da Provincia e o 30 de novembro do 2016.•