Continúan as críticas do PP pola a “falta de transparencia” do alcalde de Sarria sobre o matadoiro municipal

O Grupo Municipal Popular de Sarria condena a suposta falta de transparencia do alcalde en relación á situación do matadoiro municipal e sinala que, a pesar das súas afirmacións, “aínda non nos foron proporcionados os datos que solicitamos”. Polo tanto, o Grupo Popular ameaza con solicitar a execución do acto administrativo, pois, unha vez que pasou o prazo para a resposta, considérase a solicitude aceptada por silencio positivo.
A voceira, Carmen José López, explica que “estamos á espera do que acontecerá na reunión da Comisión de Investigación sobre o burato nas contas do matadoiro municipal que se celebrará este luns, sen que nos foron proporcionados os documentos que solicitamos en relación aos exercicios 2019, 2020, 2021 e 2022”. Estes documentos inclúen gastos e ingresos, listado de albaráns e facturas, número de sacrificios por especie de vacún, porcino, ovino e caprino, así como os detalles dos importes ingresados nas arcas municipais, incluíndo a data do servizo.
Os populares consideran “lamentable” a representación do alcalde no pleno relacionado co matadoiro, onde usou tacos de documentación da que non se coñece o contido. Neste sentido, insisten en que “queremos que o alcalde aclare os datos e explique se a falta de ingresos tamén se estende ao porcino e outras especies, algo que el negou en anteriores ocasións, sen aclarar con cifras”.
A voceira engade que, “até o momento, a actuación do alcalde non contribuíu á claridade da situación”. Recorda que, “no pleno monográfico do matadoiro, nin sequera permitiu a intervención da concelleira responsable”. Ademais, “negou a palabra cando ela intentou falar”.
Por outra parte, “comprometeuse co resto de grupos a tratar o informe de tesourería no último pleno, pero non o incluíu na orde do día”. •