Os interesados xa poden adquirir os billetes a través da web www.reservas.rutasembalses.es
O Presidente da Deputación de Lugo, José Tomé Roca, encabezou a viaxe inaugural desta temporada 2024 das rutas fluviais pola Ribeira Sacra, que xa arranca con 12.000 reservas ata final de ano. A excursión partiu do embarcadoiro de Ponte do Sil en Monforte de Lemos e contou coa presenza de varias autoridades locais e rexionais, entre elas o Deputado de Promoción Económica e Social, Pablo Rivera Capón, o Deputado de Medio Ambiente, Carlos López; a primeira tenente de Alcalde de Monforte, Gloria Prada; o Concelleiro de Obras, Medio Rural e Servizos do Concello monfortino, José Luis Díaz; o Alcalde de Sober, Luis Fernández Guitián; e Manuel Feijoo, Concelleiro da Teixeira.
José Tomé destacou o gran interese que xa suscitaron estas rutas entre grupos e familias, antes mesmo de comezar oficialmente. «Esto demostra que é un gran atractivo para a comarca», subliñou o Presidente, quen engadiu que o inicio das viaxes ordinarias coincide coa Semana Santa, o que as converte nun plan perfecto para os días festivos.
José Tomé sinalou que “a evolución nestes últimos anos é moi positiva. Dende que teño a honra de presidir esta institución, é dicir, dende o ano 2019, rexistráronse preto de 240.000 viaxeiros, e iso a pesar do impacto da pandemia. Todos os anos houbo servizo, pero, evidentemente, as restricións da Covid mermaron as visitas”. Nese sentido, explicou que foi o ano pasado, no 2023, cando se conseguiu recuperar as cifras prepandemia, con máis de 60.000 viaxeiros, e neste ano 2024 “esperamos que a tendencia siga á alza e superemos ese dato, que xa é moi bo”.
Esta aposta polas rutas fluviais en catamarán é parte dunha estratexia máis ampla para consolidar un modelo de turismo de calidade e sostible na Ribeira Sacra. A Deputación destina cada ano un orzamento significativo a este fin, considerando que é un investimento cun retorno económico directo e unha promoción a medio e longo prazo da riqueza patrimonial da comarca e da provincia de Lugo.
As reservas para as rutas fluviais pola Ribeira Sacra xa están abertas, con horarios e datas variadas ao longo da temporada. As persoas interesadas poden obter máis información e adquirir os seus billetes en reservas.rutasembalses.es.•
