Está centrado en actuacións de grupos tradicionais, bandas e corais

Mario Outeiro presentou as bases da convocatoria do programa Musiqueando pola Provincia de Lugo, dirixido a bandas, corais e grupos de música tradicional, para o que a Área de Cultura destinará 100.000 euros en 2012. Este ano é a primeira vez que se fai unha normativa explícita, debido, en parte, a que nesta ocasión o programa non contará coa aportación de Nova Caixa Galicia Banco e establécese unha normativa de uso ao incluír unha porcentaxe pagada polo solicitante.

A novidade deste ano reside no copago das actuacións, polo que a Área de Cultura se responsabiliza do 80% do orzamento das actuacións, e as asociacións solicitantes terán que asumir o 20%. Deste xeito, as bandas percibirán 1.000 euros por actuación, de maneira que a Área de Cultura aportará 800 euros e a asociación solicitante 200 euros; e as corais e grupos tradicionais percibirán 500 euros por actuación, 400 da Área de Cultura e 100 da asociación que os contrata. Os principais obxectivos deste programa son contribuír na difusión de música tradicional de bandas, corais e grupos de música tradicional, así como axudar a concellos e asociacións á hora de elaborar as súas programacións.