•O BNG denunciou a “traición do PP á cidadanía” por aprobar unha proposición de lei baseada na Iniciativa Lexislativa Popular (ILP) “emendada, desvirtuada e rebaixada de contido” •A ILP, avalada por máis de 42.000 sinaturas, pedía que o Hospital de Lugo contara cun servizo de Hemodinámica durante as 24 horas, Radioterapia e Medicina Nuclear, como hai nas demais provincias
• A sesión do Pleno do Parlamento de Galicia celebrada o 16 de decembro levantou a polémica política en torno aos servizos de Hemodinámica, Radioterapia e Medicina Nuclear que se están a demandar dende diversos frentes. Nesta sesión quedou aprobada, unicamente cos votos do Partido Popular, a Iniciativa Lexislativa Popular (ILP) avalada por 42.000 firmas, na que se solicitaba a posta en marcha destes servizos. Pero según os partidos da oposición, este texto foi aprobado pola maioría do Partido Popular logo de ser “emendada, desvirtuada e rebaixada de contido”. Así se pronunciou o deputado por Lugo do Bloque Nacionalista Galego, Cosme Pombo, que pediu a dimisión da conselleira de Sanidade, Rocío Mosquera, polo seu “desprezo e falta de respecto á cidadanía lucense”.
OS NACIONALISTAS RECLAMAN PARA LUGO “OS MESMOS SERVIZOS QUE TEN O RESTO DAS PROVINCIAS GALEGAS”
O deputado nacionalista criticou que a proposición de lei que se votou no Parlamento “non ten nada que ver coa Iniciativa Lexislativa Popular”, e salientou que “o PP burla a xusta demanda de 42.000 persoas, que reclamaban para Lugo os mesmos servizos sanitarios que o resto de galegos e galegas”.
O parlamentario nacionalista expresou a súa “rotunda oposición” ao que considerou “unha nova discriminación e trato inxusto na atención sanitaria de doentes coronarios e dos que precisan tratamentos contra o cancro na provincia de Lugo”. “Tras cinco anos”, explicou Cosme Pombo, o HULA non conta con servizos de Hemodinámica durante 24 horas, Radioterapia e Medicina Nuclear, servizos básicos e vitais para unha poboación de máis de 350.000 persoas, envellecida, moi dispersa, nunha orografía complicada e con invernos ben duros”.
OS SOCIALISTAS CUALIFICARON DE “MENTIRA E BURLA DO PP” A “ALTERACIÓN” DA ILP
Pola súa banda, o Grupo Parlamentario Socialista criticou a “hipocresía do Goberno do PP e de Feijóo” por aceptar a Iniciativa Lexislativa Popular para levar Hemodinámica 24 horas, Radioterapia e Medicina Nuclear a Lugo para emendala no debate parlamentario e cambiar completamente o seu sentido”. A deputada socialista por Lugo, Concepción Burgo, criticou que “o presidente da Xunta, desmentindo o seu compromiso, condena aos lugueses e luguesas enfermos de cancro a facer rutas de ata 10 horas para recibir 15 minutos de radioterapia”. “Ao mesmo tempo”, explicou Burgo, “condenan aos lugueses a non sobrevivir a un infarto de miocardio que teña lugar mais tarde das tres da tarde, cando pecha o servizo”.
BESTEIRO ANUNCIOU “MEDIDAS CONTUNDENTES” PARA ESIXIR ESTES SERVIZOS NO HULA
Pola súa banda, o Presidente da Deputación, José Ramón Gómez Besteiro, anunciou que levará unha moción ao vindeiro Pleno provincial e impulsará mocións tamén en todos os concellos da provincia. “Vamos a obrigar a todos os concelleiros, sexan do PSdeG, do BNG, independentes ou do PP a que se retraten diante dos seus veciños para saber se están a favor ou en contra destas reivindicacións”, subliñou, ao tempo que avanzou que en xaneiro “virán outro tipo de medidas de alto alcance porque non nos vamos quedar soamente na protesta e na discusión”.•
