•O presidente do organismo provincial explicou que «dos 120 millóns cos que nos atopamos no 2007 pasamos a cero neste 2015»
•Gómez Besteiro lembrou que «ao mesmo tempo fixemos investimentos en solitario cun forte retorno económico para a provincia, como o centro de recría, as residencias ou macro plans de emprego»
• O pasado 31 de marzo, o Pleno da Deputación provincial aprobou unha modificación orzamentaria coa que o Goberno provincial deixa a cero a débeda financeira do organismo xa neste mesmo 2015. Esta modificación do Orzamento, aprobada coa abstención do Partido Popular, consistiu en anular a operación de crédito de 3 millóns de euros que fora aprobada no presuposto de 2015 e substituíla por superávit obtido no 2014, e amortizar anticipadamente 11,1 millóns de euros de débeda, o que supón o importe de toda a que quedaba pendente. O presidente da Deputación, José Ramón Gómez Besteiro, suliñou que o organismo provincial acada esta situación «mentres se mantén, con diferencia, á cabeza das institucións provinciais de Galicia en investimento por habitante». «Dos 120 millóns de euros de endebedamento cos que nos atopamos no 2007 pasamos a cero, facendo ao mesmo tempo en solitario, investimentos millonarios cun forte retorno económico para a provincia», precisou Gómez Besteiro, en alusión a proxectos como o centro de recría, as residencias, os importantes plans de emprego, a posta en valor do Pazo de Tor, o hospital de San José, o hotel Miño ou todas as obras do Canon.
GÓMEZ BESTEIRO: «DEMOSTRAMOS QUE SI É POSIBLE OUTRA FORMA DISTINTA DE GOBERNAR»
O mandatario provincial precisou que «con esta decisión política histórica e responsable, a próxima Corporación non terá ningún tipo de atadura nin lastre, mal que lles pese a aqueles agoreiros que dicían que non levabamos ben as contas públicas». Gómez Besteiro apuntou tamén que «ninguén poderá dicir que este Goberno de socialistas e nacionalistas actuou de xeito irresponsable, e ademais demostramos que si é posible outra forma distinta de gobernar». En canto a este modelo de xestión, Besteiro explicou que «non renunciamos a investimentos, o que fixemos foi priorizar o emprego e o servizos sociais por riba, por exemplo, das estradas, e isto é o que se chama facer política e priorizar».
AO DESAPARECER A CARGA FINANCIEIRA, ESES CARTOS PODERÁN DESTINARSE A NOVOS INVESTIMENTOS
O presidente da Deputación apuntou as principais vantaxes de eliminar o endebedamento. Así, según Gómez Besteiro, en primeiro lugar desaparece a carga financeira, «polo que se deixarán de pagar intereses polos préstamos bancarios e deixaranse de destinar recursos a amortizar débeda, co que estes cartos poderanse dedicar a novos investimentos na provincia». O titular provincial explicou que son cantidades «importantes, xa que neste último exercizo pagamos 10 millóns de euros entre intereses e amortización, que, por exemplo, servirán para manter o vindeiro ano o programa social desta Deputación». Gómez Besteiro destacou que «non haberá excusas de mal pagador para tumbalo».
CON DÉBEDA CERO, MÁIS AUTONOMÍA PARA EXECUTAR O ORZAMENTO
Outra das vantaxes que xera a eliminación da débeda financieira para a Deputación lucense é que permitirá máis autonomía para executar o Orzamento. Según explicou o presidente do organismo provincial, con esta situación de débeda cero «xa non existe a obriga de destinar os aforros ao pago da débeda, porque xa non a temos, co que estes fondos quedarán liberados para destinar a investimentos». Nesta liña, Gómez Besteiro sinalou que queda «totalmente garantida a sostibilidade económica e a credibilidade» da Deputación, pois non depende de préstamos para afrontar calquer tipo de gastos, nin os correntes, nin os investimentos.
CRÍTICA Á XESTIÓN DA XUNTA
José Ramón Gómez Besteiro aproveitou a súa intervención en rolda de prensa para criticar a xestión doutras administracións, como a Xunta de Galicia, «que reduciu á metade os investimentos dende o 2009 e, ó mesmo tempo, triplicou a débeda, que teremos que pagar todos». O presidente da Deputación de Lugo avanzou que ao final do mandato entregará a cada deputado un certificado individualizado no que quede constatada oficialmente a débeda cero do organismo provincial.•
