• A comezos de outubro, o Concello de Monforte recibiu a resolución definitiva da Xunta do recurso presentado en xullo contra a denegación da axuda para poñer en marcha o obradoiro de emprego solicitado o pasado mes de febreiro.
O OBRADOIRO OFERTABA 28 PRAZAS PARA DESEMPREGADOS, E CONCEDÍA CERTIFICADO DE PROFESIONALIDADE
O proxecto presentado para este obradoiro, denominado «Rutas verdes no casco histórico de Monforte», tiña como obxectivo potenciar o conxunto histórico da cidade mediante a mellora das zonas verdes da contorna do Parque da Compañía. Ademais, o proxecto incluía diversas actuacións medioambientais pola beira do río Cabe, e outras accións de revalorización dos restos arqueolóxicos descubertos na ladeira do monte de San Vicente. A previsión de emprego era de 28 prazas destinadas a persoas en paro da cidade, que se encargarían de realizar os correspondentes traballos ao tempo que recibían formación na modalidade específica. Asimesmo, ao remate do obradoiro, os participantes recibirían o certificado de profesionalidade, que lles permitiría mellorar as súas opción de atopar traballo.
Según informaron dende o Concello, a Consellería de Traballo rexeitou este proxecto por unha diferencia de 0,25 puntos, ao establecer para a provincia de Lugo unha puntuación mínima de 32,25, e valorar o proxecto presentado por Monforte en 32 puntos. O alcalde lamentou este rexeitamento, xa que «por esta curta diferencia non se poderá poñer en marcha o obradoiro». José Tomé apuntou a «criterios moi subxectivos» por parte da Consellería para valorar os proxectos, como o carácter innovador ou as expectativas de emprego que puidera ter. O alcalde comparou a valoración da Xunta coa dos técnicos municipais, que daban ao proxecto unha «nota razoable» de 39 puntos.
«Non é normal que, ano tras ano, se rexeiten de xeito sistemático as propostas de emprego da segunda cidade máis importante da provincia», lamentou Tomé, que espera que «as cousas cambien a partir de agora».
Dende a oposición, Espertamonforte! pronunciouse sobre este tema, suliñando que «a cor política non debe ser presentada como posible criterio de valoración» deste tipo de iniciativas, e esixiron á Xunta que estableza criterios «totalmente obxectivos» nas bases reguladoras. Asimesmo, dende esta formación política alentaron ao equipo municipal «para que siga traballando nas pesquisas necesarias e recurrindo para asegurar a fiabilidade dos procedementos».•
