A Xunta de Galicia, liderada por Alfonso Rueda, está a introducir importantes cambios no sistema de transporte público para o vindeiro ano, como parte dos Orzamentos para 2024. A partir do 1 de xaneiro, os cidadáns maiores de 65 anos poderán viaxar de balde nas liñas interurbanas do autobús da Xunta, ampliando así a gratuidade que xa se aplicaba aos mozos menores de 21 anos mediante a tarxeta Xente Nova.
Trátase dunha medida da que se beneficiarán máis de 50.000 persoas. O mandatario galego adiantou esta medida no Pleno do Parlamento de Galicia, onde apuntou que esta iniciativa se suma a outras do Goberno galego de apoio a este colectivo, recollidas no Orzamento de 2024. En concreto, referiuse ao Carné +65, semellante ao Carné Xove, e que permitirá a este colectivo desfrutar de descontos en servizos, establecementos ou ocio.
José Manuel Balseiro, voceiro de Infraestruturas do Grupo Popular no Parlamento de Galicia e deputado lucense, sinalou que esta medida busca fomentar a mobilidade sostible na comunidade e facilitar os traslados para as persoas maiores, especialmente na zona rural, onde o transporte público xoga un papel crucial para acceder a servizos de saúde, facer trámites ou participar en actividades de lecer.
Ademais, Balseiro destacou que o novo programa de transporte público representa unha verdadeira «revolución» na mobilidade por autobús.•
